2023 రివ్యూ: సినీప‌రిశ్ర‌మ‌లో టాప్ 8 వివాదాలు

డీప్‌ఫేక్ వేధింపులు.. చెత్త కామెంట్లు.. ఊహించని ఘర్షణలు.. వివాదాలు .. ఆత్మ‌హ‌త్య‌లు ఈ ఏడాది సినీప‌రిశ్ర‌మ‌ల్లో విస్త్ర‌తంగా మైలేజ్ పొందిన వార్తాంశాలివి. కార‌ణం ఏదైనా కానీ.. పలువురు సెల‌బ్రిటీలు అన‌వ‌స‌రంగా ప్ర‌జ‌ల‌ నోళ్ల‌లో నానారు. అలాంటి వారిపై ఒక లుక్కేస్తే ..

అల్లు అర్జున్ పుష్ప: ది రైజ్ చిత్రంలో తన స‌హాయ‌క పాత్ర‌తో పాపుల‌రైన జగదీష్ ప్రతాప్ బండారి, బ్లాక్ మెయిల్ చేసి తన ప్రియురాలి ఆత్మహత్యకు కారణమయ్యాడని ఆరోప‌ణ‌ల‌పై అరెస్టు అయ్యాడు. అత‌డు కనిపించకుండా పారిపోయాడు. కానీ డిసెంబర్ 6న అరెస్టు అయ్యాడు. సెక్షన్ 306 కింద అభియోగాలు మోపారు. అతడి అరెస్టు పుష్ప 2 షూటింగ్ షెడ్యూల్‌కు అంతరాయం కలిగించింది. నిర్మాతలు ప్రొడక్షన్ అంతరాయాలను తగ్గించి, షెడ్యూల్‌లను మార్చవలసి వచ్చింది.

రష్మిక మందన్న ఊహించ‌ని డీప్ ఫేక్ వీడియో సంచ‌ల‌న‌మైన సంగ‌తి తెలిసిందే. బ్రిటీష్-ఇండియన్ ఇన్‌ఫ్లుయెన్సర్ జారా పటేల్ ఒరిజినల్ వీడియోపై సృష్టించిన డీప్‌ఫేక్ వీడియో ట్రాప్‌కి రష్మిక మందన్న ఇటీవల బాధితురాలిగా మారింది. త‌న‌ సమ్మతి లేకుండా పటేల్ వీడియోపై ర‌ష్మిక‌ మందన్న ముఖాన్ని సూపర్మోస్ చేసిన డీప్‌ఫేక్ వీడియో క‌ల‌క‌లం రేపింది. దీనిని ర‌ష్మిక తీవ్రంగా ఖండించింది. టెక్నాలజీని దుర్వినియోగం చేయడంపై మందన్న ఆవేదన వ్యక్తం చేశారు. త‌న‌కు మ‌ద్ధ‌తుగా నిలిచిన వారికి కృతజ్ఞతలు తెలిపింది. అలాంటి చెడుపై చట్టపరమైన చర్య తీసుకోవాలని అంతా పిలుపునిచ్చారు.

త్రిష కృష్ణన్ పై మన్సూర్ అలీ ఖాన్ వివాదాస్పద వ్యాఖ్యలు సంచ‌ల‌నం అయ్యాయి. నటుడు మన్సూర్ అలీ ఖాన్ లియో చిత్రంలో తన సహనటి త్రిష కృష్ణన్ గురించి అవమానకరమైన *క్సిస్ట్ వ్యాఖ్యలు చేసినందుకు తీవ్ర విమ‌ర్శ‌లు ఎదుర్కొన్నాడు. జాతీయ మహిళా కమిషన్‌ ఫిర్యాదు మేరకు చెన్నై పోలీసులు అతడిని అరెస్టు చేశారు. త‌ర్వాత అత‌డు చులకనగా మాట్లాడుతూ త్రిష‌కు క్షమాపణలు చెప్పాడు. సెక్షన్లు 354(A) (లైంగిక వేధింపులు) & 509 (మహిళ యొక్క అణకువను అవమానించాడు) కింద అభియోగాలు మోపారు. సామాజిక మాధ్యమాల్లో క్షమాపణలు కోరినా అత‌డికి ఫ‌లితం ద‌క్క‌లేదు.

సమంత రూత్ ప్రభుపై నిర్మాత చిట్టిబాబు వ్యాఖ్యలు హాట్ టాపిక్ అయ్యాయి. స్టార్ హీరోయిన్‌గా ఆమె కెరీర్ ముగిసిందంటూ అత‌డు వ్యాఖ్యానించాడు. దీనిపై సమంత స్పందిస్తూ సోషల్ మీడియాలో పరోక్షంగా అతడిని ఎగతాళి చేసింది. చిత్ర పరిశ్రమలో నటీనటులు ఎదుర్కొంటున్న సవాళ్లు, విమర్శలను ఈ ఘ‌ట‌న ఎలివేట్ చేసింది.

యానిమల్‌ సినిమా ప్రమోషన్‌ సందర్భంగా తెలంగాణ మంత్రి మల్లారెడ్డి వచ్చే ఐదేళ్లలో భార‌త‌దేశాన్ని, బాలీవుడ్‌ను తెలుగు ప్రజలే శాసిస్తారంటూ వివాదానికి తెర లేపారు. హైద‌రాబాద్ నగరాన్ని మెచ్చుకుంటూ రణబీర్ కపూర్‌ను హైదరాబాద్‌కు షిఫ్ట్ అవ్వాలని కోరారు. ఈ వ్యాఖ్యపై తీవ్ర విమ‌ర్శ‌లు వెల్లువెత్తాయి. ఇది అంద‌రినీ ఇబ్బందికి గురి చేసింది. అతడి ప్రకటనలతో రాజకీయంగాను ప్ర‌కంప‌న‌లు మొద‌ల‌య్యాయి.

నటి విచిత్ర తన బిగ్ బాస్ 7 తమిళ సంభాషణలో తెలుగు సినిమా సెట్‌లో అనుచిత ప్రవర్తనను వివరిస్తూ ఒక బాధాకరమైన అనుభవాన్ని షేర్ చేసారు. ఆమె బెదిరింపులను, అసౌకర్య పరిస్థితులను ఎదుర్కొన్నాన‌ని, అనుచితమైన స్పర్శ ఎదురైంద‌ని తెలిపింది. విచిత్ర భర్త ఆమెను రక్షించేందుకు రోజూ రహస్యంగా త‌న‌ గదిని మార్చేవాడు. వినోద పరిశ్రమలో మహిళలు ఎదుర్కొంటున్న సవాళ్లను ఈ సంఘటన వెలుగులోకి తెచ్చింది.

నమ్మక ద్రోహం కారణంగా తాను నటుడు శివకార్తికేయన్ తో ఇకపై మాట్లాడ‌న‌ని సంగీత దర్శకుడు ఇమ్మాన్ ఒక ఇంటర్వ్యూలో వెల్లడించారు. వ్యక్తిగత కారణాలు , తన పిల్లలను రక్షించుకోవాల్సిన అవసరాన్ని పేర్కొంటూ ఇమ్మాన్ భవిష్యత్తులో అత‌డితో క‌లిసి ప‌ని చేయ‌న‌ని అన్నాడు. చిత్ర పరిశ్రమలోని సంక్లిష్టతలు, సంబంధాల బేల‌త‌నాన్ని ఇది బ‌య‌ట‌పెట్టింది.

పులి గోళ్లను కలిగి ఉన్నారనే ఆరోపణలపై దర్శన్ తూగుదీప సహా కన్నడ నటుల ఇళ్లలో అటవీశాఖ అధికారులు తనిఖీలు నిర్వహించారు. పులి పంజా లాకెట్టు ధరించినందుకు పలువురు నటులను అరెస్టు చేసిన తర్వాత ఈ త‌ర‌హా శోధ‌న క‌ల‌వ‌ర‌పెట్టింది. నిఖిల్ కుమారస్వామి నిజమైన పులి పంజాను కలిగి ఉన్నాడనే ప్ర‌చారాన్ని ఖండించాడు. దానిని బహుమతిగా అందుకున్న‌ట్టు తెలిపాడు. ప్ర‌స్తుతం వీళ్ల‌పై విచారణ కొనసాగుతోంది.