‘ఫ్యామిలీ స్టార్’ డైలాగ్ వైరలైపోయింది!

కొన్నిసార్లు సోషల్ మీడియాలో ఏది పాపులర్ అవుతుందో.. ఏం వైరల్ అవుతుందో చెప్పలేం. నెటిజన్లకు కొన్ని విషయాల మీద ఉన్నట్లుండి ఆసక్తి పుట్టి దాన్ని పాపులర్ చేస్తుంటారు. విజయ్ దేవరకొండ కొత్త చిత్రం 'ఫ్యామిలీ స్టార్'లోని ఒక డైలాగ్ కొంచెం లేటుగా సోషల్ మీడియాను ఊపేస్తోంది.

ఈ టీజర్ చివర్లో ఒక ఇనుప కడ్డీని వంచుతూ విజయ్.. "ఐరన్నే వంచాలా ఏంటి" అని డైలాగ్ చెబుతాడు. టీజర్లో కొసమెరుపులా ఉన్న ఆ సీన్, డైలాగ్ బాగానే ఆకట్టుకున్నాయి. ఐతే టీజర్ రిలీజైనప్పుడు ఈ డైలాగ్ విషయంలో జనాలు మరీ ఏమీ ఊగిపోలేదు. కానీ కొన్ని రోజుల తర్వాత ఈ డైలాగ్ అనూహ్యమైన స్పందన తెచ్చుకుంటోంది. రెండు రోజులుగా సోషల్ మీడియాను ఈ డైలాగ్ ఊపేస్తోంది. 'ఐరన్నే వంచాలా ఏంటి' అనే హ్యాష్ ట్యాగ్ ఇప్పుడు ఒక రేంజిలో ట్రెండ్ అవుతోంది. దీని మీద జోక్స్, మీమ్స్ మామూలుగా లేవు.

తెలుగు సినిమాల్లో పాపులర్ సీన్లు చాలా వాటికి ఈ డైలాగ్‌ను జోడించి దీన్ని ట్రెండ్ చేస్తున్నారు. 'మిర్చి' సినిమాలో నా ఫ్యామిలీ సేఫ్ అని ప్రభాస్ చెప్పే డైలాగ్ స్థానంలో 'ఐరన్నే వంచాలా ఏంటి' అనే డైలాగ్ పెట్టి క్రియేట్ చేసిన ఒక మీమ్ వైరల్ అవుతోంది. దీని మీద విజయ్ కూడా స్పందించాడు.

అసలేం జరుగుతోంది ట్విట్టర్లో అని అతను ఆశ్చర్యపోయాడు. 'ఫ్యామిలీ స్టార్'ను నిర్మిస్తున్న వెంకటేశ్వర క్రియేషన్స్ సంస్థ ట్విట్టర్ అకౌంట్ నుంచి కూడా దీని మీద స్పందించారు. 'పుష్ప'లోని తగ్గేదేలే.. తరహాలో ఈ 'ఐరన్నే వంచాలా ఏంటి' అనే డైలాగ్ హుక్ వర్డ్ లాగా మారిపోయి ఇప్పుడు సోషల్ మీడియాను ఊపేస్తోంది.

సినిమాకు ఇది మంచి ప్రచారం తెచ్చిపెడుతుండటంతో టీం అంతా హ్యాపీగా ఈ ట్రెండ్‌ను ఎంజాయ్ చేస్తోంది. పరశురామ్ డైరెక్ట్ చేస్తున్న 'ఫ్యామిలీ స్టార్' సంక్రాంతి కానుకగా రిలీజ్ కానున్న సంగతి తెలిసిందే.