ఆ ఘటనతో వెనుకడుగు వేసిన డాకు మహరాజ్

నందమూరి బాలకృష్ణ కెరీర్ లోనే అత్యధిక బడ్జెట్ తో రూపొందిన డాకు మహరాజ్ సినిమా ఈ సంక్రాంతికి గ్రాండ్ గా రిలీజ్ అవుతోన్న విషయం తెలిసిందే. ఈ సినిమాపై అంచనాలు ఏ స్థాయిలో ఉన్నాయో.ప్రత్యేకంగా చెప్పనవసరం లేదు. ఇక సినిమాకు సంబంధించిన ప్రమోషన్ విషయంలో అంతగా సౌండ్ లేదని ఫ్యాన్స్ నుంచి కామెంట్స్ వస్తున్నాయి. ఇక ఈ విషయంలో మేకర్స్ ఆలోచించి మంచి హైప్ క్రియేట్ చేయాలని అనుకుంటున్న సమయంలో ఒక చేదు అనుభవం ఎదురైంది.

ప్రీ రిలీజ్ ఈవెంట్ నిర్వహించాల్సిన సమయంలో ఊహించని విధంగా ఏపీలో ఓ ఘటన చోటు చేసుకోవడంతో మేకర్స్ వెనక్కి తగ్గాల్సి వచ్చింది. తిరుమల శ్రీవేంకటేశ్వర స్వామి ఆలయంలో జరిగిన ఘోర ఘటన యావత్ దేశాన్ని దిగ్భ్రాంతికి గురి చేసింది. బుధవారం రాత్రి వైకుంఠ ద్వార దర్శన టికెట్ల కోసం భక్తులు పెద్ద సంఖ్యలో తరలివచ్చారు. అప్రమత్తమైన టీటీడీ భారీ ఏర్పాట్లు చేసినప్పటికీ, తొక్కిసలాట కారణంగా ఆరుగురు భక్తులు ప్రాణాలు కోల్పోయారు.

పదుల సంఖ్యలో గాయపడిన వారిని ఆసుపత్రికి తరలించారు. ఈ విషాదం మోసిన తీరును చూసి భక్త లోకం సంతాపం వ్యక్తం చేస్తోంది. ఇలాంటి పరిస్థితుల్లో వేడుకలు నిర్వహించడం అనుచితం అనే అభిప్రాయంతో డాకు మహారాజ్ చిత్ర బృందం ప్రీ రిలీజ్ ఈవెంట్‌ను రద్దు చేసుకోవాలని నిర్ణయించింది. గురువారం అనంతపురం వేదికగా ఈ కార్యక్రమం జరుగాల్సి ఉంది.

నందమూరి బాలకృష్ణ హీరోగా నటించిన ఈ చిత్రంపై భారీ అంచనాలు ఉన్నాయి. సంక్రాంతి పండుగ సందర్భంగా ఈ చిత్రం ప్రేక్షకుల ముందుకు వస్తుండడంతో ప్రమోషన్ కు ఇదే కీలకమైన సమయం. రాయలసీమలో బాలయ్య అభిమానులకు డాకు మహారాజ్ సినిమాపై భారీ ఆశలు ఉన్నాయి. అల్లుడు నారా లోకేశ్ ముఖ్య అతిథిగా హాజరుకానున్న ఈవెంట్ కోసం భారీ ఏర్పాట్లు చేయడం జరిగింది.

అయితే, తిరుపతి ఘటనతో నెలకొన్న బాధాకర పరిస్థితుల దృష్ట్యా, శ్రేయోభిలాషుల సూచనతో ఈవెంట్ రద్దు చేయడం నిర్ణయించుకున్నారు. ఇది బాధిత కుటుంబాలకు తగిన గౌరవం చూపడమే కాకుండా, ప్రజల మనోభావాలను కూడా పరిరక్షించడమే. ఇదిలా ఉంటే, బాలకృష్ణ ప్రస్తుతం తన కెరీర్‌లో మంచి ఊపుమీద ఉన్నారు. వరుస హిట్లతో అభిమానులను అలరిస్తూ, రాయలసీమ ప్రాంతంలో తన ప్రభావాన్ని కొనసాగిస్తున్నారు.

డాకు మహారాజ్ ట్రైలర్, టీజర్‌లు ఇప్పటికే మంచి స్పందనను పొందాయి. కానీ, ప్రీ రిలీజ్ ఈవెంట్ రద్దు అయినందున, సినిమా ప్రమోషన్‌ను సోషల్ మీడియా ద్వారా మరింత వేగవంతం చేయాలని చిత్ర బృందం భావిస్తోంది. సినిమా ప్రీ రిలీజ్ ఈవెంట్ రద్దు అయినప్పటికీ, విడుదల తేదీపై ఎటువంటి మార్పులు ఉండవని స్పష్టం చేశారు. ఈ సంక్రాంతి బరిలో డాకు మహారాజ్ ఎలాంటి విజయాన్ని సాధిస్తుందో చూడాలి. బాలయ్య సినిమాలంటే మాస్ ఆడియన్స్‌కు ప్రత్యేకమైన ఆకర్షణ, మరి ఈ సినిమా కూడా అదే స్థాయిలో విజయవంతమవుతుందా అన్నది ఆసక్తికరంగా మారింది.