పవన్ మాదిరిగా బాలయ్య కూడా...!

ఏపీలో జరుగబోతున్న అసెంబ్లీ ఎన్నికలు తెలుగు సినిమా ఇండస్ట్రీ పై చాలా ప్రభావం చూపిస్తుంది. ఇప్పటికే పలు సినిమాలు ఎన్నికల కారణంగా వాయిదా పడ్డాయి. ప్రభాస్ కల్కి సినిమా కూడా ఎన్నికల కారణంగా వాయిదా పడటం దాదాపుగా కన్ఫర్మ్‌ అయ్యింది.

ఎన్నికల కారణంగా పవన్ కళ్యాణ్ సినిమాలన్నింటిని కూడా పక్కన పెట్టేశాడు. ఆయన చేస్తున్న మూడు సినిమాలు షూటింగ్‌ ప్రారంభం అయ్యి వివిధ దశల్లో ఉన్నాయి. ఇక బాలయ్య సినిమా లు కూడా ఎన్నికల కారణంగా కాస్త అటు ఇటు అయ్యే పరిస్థితి కనిపిస్తుంది.

బాలకృష్ణ మరియు బోయపాటి కాంబోలో మూవీ ప్రారంభం అవ్వాల్సి ఉన్నా కూడా ఎన్నికల కారణంగా వాయిదా వేశారనే వార్తలు వస్తున్నాయి. బాబీ దర్శకత్వంలో ప్రస్తుతం బాలయ్య ఒక సినిమా ను చేస్తున్నాడు. ఆ సినిమా షూటింగ్‌ కూడా ఎన్నికల హడావుడి కారణంగా ఆలస్యం అయ్యేలా ఉంది.

ఎన్నికల కోసం బాలయ్య నెల రోజులకు పైగా ఏపీలో పర్యటించబోతున్నాడు. పవన్ ఎలా అయితే తన నియోజక వర్గం మరియు ఇతర నియోజక వర్గాల్లో ప్రచారం చేయబోతున్నాడో అలాగే బాలకృష్ణ కూడా సినిమా షూటింగ్స్ అన్నీ పక్కన పెట్టి మూడోసారి ఎమ్మెల్యేగా విజయం కోసం కష్టపడబోతున్నాడు.

బాలకృష్ణ సినిమా ఆలస్యం అయ్యే అవకాశాలు ఉన్న నేపథ్యంలో బోయపాటి మరో సినిమాను మొదలు పెట్టే అవకాశాలు ఉన్నాయని తెలుస్తోంది. బోయపాటి ఇప్పటికే గీతా ఆర్ట్స్ బ్యానర్‌ లో ఒక సినిమాకు సైన్ చేశాడు. ఆ సినిమా కు సంబంధించిన షూటింగ్‌ ను వేసవి చివర్లో ప్రారంభించి ఈ ఏడాది చివరి వరకు ముగించే విధంగా బోయపాటి ప్లాన్‌ చేస్తున్నాడనే పుకార్లు షికార్లు చేస్తున్నాయి.

బోయపాటి శ్రీను దర్శకత్వంలో బాలకృష్ణ ఇప్పటికే సింహా, లెజెండ్‌ మరియు అఖండ సినిమాలు చేశాడు. హ్యాట్రిక్ సాధించిన వీరి కాంబో మూవీ వెంటనే వస్తుంది అనుకుంటే ఎన్నికల వల్ల ఆలస్యం అయ్యేలా ఉంది. వచ్చే ఏడాది చివరి వరకు ఈ హిట్‌ కాంబో మూవీ కోసం వెయిట్‌ చేయాల్సిందేనేమో..!