మొన్న శ్రీమంతుడు.. ఇప్పుడు బేబీ.. మేకర్స్ పై కేసు?

కంటెంట్ బాగుంటే చాలు.. సినిమాలు ఎంత పెద్ద హిట్ అవుతాయో అందరికీ తెలిసిందే. అలాంటి సినిమాల్లో బేబీ ఒకటి. సాయి రాజేష్ దర్శకత్వంలో గతేడాది వచ్చిన ఈ మూవీ సూపర్ హిట్ గా నిలిచింది. విజయ్ దేవరకొండ తమ్ముడు ఆనంద్ దేవరకొండ హీరోగా నటించిన ఈ మూవీలో వైష్ణవి చైతన్య హీరోయిన్ గా యాక్ట్ చేసింది. అందమైన ప్రేమ కథగా తెరకెక్కిన ఈ సినిమా ప్రేక్షకులను విపరీతంగా ఆకట్టుకుంది.

యువతను ఆకట్టుకునే కథతో ఈ సినిమాను సాయి రాజేష్ తెరకెక్కించి మంచి ఫేమ్ సంపాదించారు. ఇక సోషల్ మీడియాలో విపరీతమైన ఫాలోయింగ్ సొంతం చేసుకుంది వైష్ణవి చైతన్య. తన నటనతో ఈ సినిమాలో మార్కులు కొట్టేసింది. ఈ మూవీ థియేటర్స్ లోనే కాదు ఓటీటీలో కూడా సూపర్ హిట్ గా నిలిచింది. బాలీవుడ్ లో ప్రస్తుతం ఈ సినిమా రీమేక్ అవుతోంది. తాజాగా ఈ సినిమా స్టోరీపై వివాదం తలెత్తినట్లు తెలుస్తోంది.

బేబీ మూవీ స్టోరీ తనదేనని హైదరాబాద్‌ లోని రాయదుర్గం పోలీస్ స్టేషన్ లో షార్ట్‌ ఫిల్మ్ డైరెక్టర్‌ కమ్ సినిమాటోగ్రాఫర్‌ శిరిన్‌ శ్రీరామ్‌ ఫిర్యాదు చేసినట్లు సమాచారం. ఆ సినిమా కథను తాను కొన్నేళ్ల క్రితమే మేకర్స్ కు చెప్పినట్లు శిరిన్ శ్రీరామ్ ఫిర్యాదులో పేర్కొన్నారట. కాపీరైట్ చట్టాన్ని బేబీ మేకర్స్ ఉల్లంఘించారని ఆరోపించారట. 2013లో ఓ సినిమా విషయంలో రాజేష్ తో పరిచయం ఏర్పడినట్లు శ్రీరామ్ చెప్పారట.

2015లో తాను రాసుకున్న కథకు ప్రేమించొద్దు అనే టైటిల్ పెట్టుకున్నట్లు శిరిన్ శ్రీమ్ ఫిర్యాదులో చెప్పారట. ఆ కథనే సాయి రాజేష్ సజెషన్ తో ప్రొడ్యూసర్ ఎస్ కే ఎన్ కు వివరించానని పేర్కొన్నారట. ఆ స్టోరీయే బేబీ టైటిల్ తో తెరకెక్కిందని శ్రీరామ్ ఆరోపిస్తున్నారట. ఆ మూవీ కథ మొత్తం తనదేనని శిరిన్ శ్రీరామ్ పోలీసులకు ఫిర్యాదు చేశారట. ఈ విషయంపై అధికారిక వివరాలు తెలియాల్సి ఉంది.

ప్రస్తుతం ఇండస్ట్రీలో ఈ విషయం హాట్ టాపిక్ గా మారింది. ఇప్పటికే శ్రీమంతుడు సినిమా స్టోరీపై ఇష్యూ నడుస్తున్న విషయం తెలిసిందే. రైటర్ శరత్ చంద్ర అలియాస్ ఆర్డీ విల్సన్ ఈ సినిమాపై కాపీరైట్ కేసును నమోదు చేశారు. తన చచ్చేంత ప్రేమ నవల నుంచి శ్రీమంతుడు స్టోరీని కాపీ కొట్టారని ఆరోపించారు. ఇంకా ఈ కేసు ఓ కొలిక్కి రాకముందే.. తెరపైకి బేబీ సినిమా స్టోరీ వివాదం రావడం గమనార్హం.