'అథర్వ' సింగిల్ షాట్ స్నీక్ పీక్.. ఇదేదో కొత్తగా ఉందే..

క్లూస్ టీం ప్రాముఖ్యతను చూపించేలా మహేష్ రెడ్డి దర్శకత్వంలో కార్తీక్ రాజు, సిమ్రాన్ చౌదరి, ఐరా హీరో, హీరోయిన్లుగా నటించిన తాజా చిత్రం 'అథర్వ'. క్రైమ్ సస్పెన్స్ ఇన్వెస్టిగేషన్ థ్రిల్లర్ గా రూపొందిన ఈ చిత్రాన్ని నూతలపాటి నరసింహం, అనసూయమ్మ సమర్పణలలో పెగ్గో ఎంటర్టైన్మెంట్స్ బ్యానర్ పై సుభాష్ నూతలపాటి నిర్మించారు. ఇప్పటికే ఈ సినిమా నుంచి విడుదలైన టీజర్, ట్రైలర్, సాంగ్స్ ఆడియన్స్ నుంచి మంచి రెస్పాన్స్ అందుకున్నాయి.

అన్ని కార్యక్రమాలు పూర్తి చేసుకొని డిసెంబర్ 1న ఈ మూవీ థియేటర్స్ లో సందడి చేయబోతోంది. ఈ నేపథ్యంలోనే సినిమాపై మరింత ఆసక్తి కలిగించేలా ఓ స్నీక్ పీక్ ను రిలీజ్ చేశారు మేకర్స్. మరో ఆసక్తికర విషయం ఏంటంటే ఈ స్నీక్ పీక్ ను సింగిల్ షాట్ లో తీసినట్లు తెలియజేశారు. ఇక ఈ సింగిల్ షాట్ లో తీసిన స్నీక్ పీక్ ని గమనిస్తే..

ఓ ఫ్యామిలీకి చెందిన ముగ్గురు వ్యక్తుల హత్య జరుగుతుంది. ఈ క్రమంలో క్లూస్ టీం వచ్చి క్లూస్ కలెక్ట్ చేసే పనిలో ఉంటుంది. ఇది క్లూస్ టీమ్ లోనే హీరో, హీరోయిన్లు ఉంటారు. ఆ క్లూస్ ని ఎలా కలెక్ట్ చేస్తారో ఎంతో డీటెయిల్ గా ఇందులో చూపించారు. క్లూస్ కలెక్ట్ చేసే పనిలో టీం ఉంటే పోలీసు వచ్చి తన డ్యూటీ తాను చేసుకుంటాడు. అనంతరం ఈ హత్యల గురించి మీడియాకు సమాచారాన్ని అందిస్తాడు.

సుమారు మూడు నిమిషాలు నిడిమి ఉన్న ఈ సన్నివేశాన్ని సింగిల్ షాట్ లో తీయడం విశేషం. ఇక స్నీక్ పీక్ లో చూపించిన దాని ప్రకారం ఈ హత్యలు ఎవరు చేశారు? ఎందుకు చేశారు? ఆ అమ్మాయిని రేప్ చేసి హత్య చేసింది ఎవరు? వీటి వెనకాల ఉన్నది ఎవరు? ఇలాంటి విషయాలన్నీ తెలియాలంటే ఈ సినిమా చూడాల్సిందే. ఇప్పటివరకు ఈ మూవీ నుంచి రిలీజ్ అయిన ప్రమోషనల్ కంటెంట్ కి మంచి రెస్పాన్స్ వచ్చింది.

తాజాగా రిలీజ్ చేసిన స్నీక్ పీక్ కూడా సినిమాపై అంచనాలను పెంచేసింది. దీనికంటే ముందు ఈ సినిమా నుంచి ఓ పాటని విడుదల చేశారు మూవీ యూనిట్. 'కెసీపీడీ' అంటూ సాగే ఈ వీడియో సాంగ్ కి మంచి రెస్పాన్స్ వస్తోంది. ఊరి వాతావరణం లో ఎంతో సహజంగా ఈ పాటను చిత్రీకరించారు. పాటలో హీరో కార్తీక్ రాజు తన డాన్స్ తో ఆకట్టుకున్నాడు. శ్రీ చరణ్ పాకాల సంగీతం అందిస్తున్న ఈ చిత్రాన్ని తెలుగుతో పాటు తమిళ, కన్నడ, మలయాళ భాషల్లో విడుదల చేస్తున్నారు.