ఆర్య‌న్ ఖాన్ సిరీస్ లో ఆ స్టార్ హీరో పిల్ల‌ల క్యామియో!

బాలీవుడ్ బాద్‌షా షారుఖ్ ఖాన్ కొడుకు ఆర్య‌న్ ఖాన్ డైరెక్ట‌ర్ గా ప‌రిచ‌యం అవుతున్న విష‌యం తెలిసిందే. మామూలుగా హీరోల కొడుకులు ఎక్కువ‌గా హీరోలే అవుతారు. కానీ షారుఖ్ ఖాన్ కొడుకు మాత్రం యాక్టింగ్ వైపు కాకుండా డైరెక్ష‌న్ వైపు అడుగులేసి ఆ దిశ‌గా స‌క్సెస్ అవాల‌ని చూస్తున్నాడు. అయితే ఆర్య‌న్ ఖాన్ త‌న డెబ్యూని సినిమాతో చేయ‌డం లేదు.

ఆర్య‌న్ ఖాన్ ముందుగా ఓ వెబ్ సిరీస్ ను డైరెక్ట్ చేయ‌నున్నాడు. ఈ వెబ్ సిరీస్ ఈ సంవ‌త్స‌ర‌మే నెట్‌ఫ్లిక్స్ లో రిలీజ్ కానుంది. మొద‌టి వెబ్ సిరీస్ క‌దా అని దీన్నేమీ ఆర్య‌న్ నార్మ‌ల్ గా తెర‌కెక్కించ‌డం లేదు. చాలా భారీ క్యాస్టింగ్ తో ఈ వెబ్ సిరీస్ ను రూపొందిస్తున్నాడు ఆర్య‌న్. ఇందులో బాలీవుడ్ స్టార్ క్యాస్ట్ సల్మాన్ ఖాన్, అలియా భ‌ట్, ర‌ణ్‌బీర్ క‌పూర్, ర‌ణ్‌వీర్ సింగ్ లాంటి వారు గెస్ట్ రోల్స్ చేయ‌నుండ‌టంతో ఈ సిరీస్ పై భారీ బ‌జ్ నెలకొంది.

సైఫ్ అలీ ఖాన్ సంతానం సారా అలీ ఖాన్, ఇబ్ర‌హీం అలీ ఖాన్ కూడా ఈ సిరీస్ లో న‌టించార‌ని రీసెంట్ గా సైఫ్ వెల్ల‌డించాడు. వేవ్స్ 2025 స‌మ్మిట్ లో భాగంగా నెట్‌ఫ్లిక్స్ సీఈఓ టెడ్ స‌రండోస్ తో మాట్లాడుతూ, సైఫ్ ఈ విషయాన్ని చెప్పాడు. అంతేకాదు, తాను ఆల్రెడీ ఈ సిరీస్ ప్రివ్యూ చూశాన‌ని, సిరీస్ ఎంతో అద్భుతంగా వ‌చ్చింద‌ని వెల్ల‌డించాడు.

ఈ సిరీస్ లో సారా, ఇబ్ర‌హీం ఇద్ద‌రూ కొన్ని నిమిషాల పాటూ క‌నిపించ‌నున్నార‌ని చెప్పారు. బా***డ్స్ గా రూపొందుతున్న ఈ వెబ్ సిరీస్ ఒక సాధార‌ణ వ్య‌క్తి అత‌ని ఫ్రెండ్స్ గ్రూప్ తో క‌లిసి బాలీవుడ్ లో త‌మ‌కంటూ త‌గిన గుర్తింపు, పేరు సంపాదించుకోవ‌డానికి ప్ర‌య‌త్నిస్తున్న జ‌ర్నీగా రూపొందింది. ఈ సిరీస్ తో షారుఖ్ కొడుకు ఆర్య‌న్ ఖాన్ ఎలాంటి సెన్సేష‌న్ ను క్రియేట్ చేస్తాడో చూడాలి.