బాహుబలిపై ఈ కొత్త సస్పెన్స్ ఏంటో?

బాహుబలి సినిమాలో బాగా హైలైట్ అయిన క్యారెక్టర్లలో కట్టప్ప పాత్ర ఒకటి. ఐతే ఆ పాత్ర ఫ్లాష్ బ్యాక్ లో ఎలా ఉందో.. వర్తమానంలోనూ అలాగే కనిపించింది. రూపంలో పెద్దగా మార్పు కనిపించలేదు. దీని గురించి ఓ ఇంటర్వ్యూలో విజయేంద్ర ప్రసాద్ ను అడిగితే విచిత్రమైన సమాధానం చెప్పారు. ‘‘ఫ్లాష్ బ్యాక్ లో చూపించే కట్టప్ప.. వర్తమానంలో చూపించే కట్టప్ప ఒకరేనని ఎవరైనా చెప్పారా? ఇద్దరుండొచ్చు కదా.. అసలు భల్లాల దేవుడు కూడా ఒకరే ఉన్నారా.. అలాంటోడు మరొకరున్నారా? ఏమీ విడమరిచి చెప్పలేదు కదా. కాబట్టి రెండో పార్ట్ కోసం ఎదురు చూడండి’’ అని జవాబిచ్చి ఆశ్చర్యపరిచారు.

ఇప్పటికే బాహుబలి రెండో పార్ట్ గురించి జనాలు ఎన్నో సందేహాలతో బుర్రలు బద్దలు కొట్టుకుంటుంటే... విజయేంద్ర ప్రసాద్ మాటలు గందరగోళాన్ని మరింత పెంచాయి. తొలి భాగం అసంపూర్తిగా ఉండటం, అర్ధంతరంగా ముగించేయడం గురించి వస్తున్న విమర్శలపై విజయేంద్ర ప్రసాద్ మాట్లాడుతూ.. ‘‘నాకు తెలిసినావిడ సినిమా చూసి.. రెండున్నర గంటల బాహబలి ట్రైలర్ చాలా బాగుందండీ. సినిమా ఎప్పుడు చూపిస్తారు అని సెటైర్ వేసింది. నిజానికి నా అభిప్రాయం కూడా అదే. బాహుబలి అసలు కథంతా రెండో పార్టులోనే ఉంది. ఇప్పుడు చూపించింది ట్రైలర్ మాత్రమే అనుకోవాలి. బాహుబలి-2 గొప్పగా ఉంటుంది. అది వచ్చే వరకు ప్రేక్షకులు ఎదురు చూడాలి’’ అని చెప్పారు.