విజయ్ కొత్త అవతారం ఎత్తాడు

సౌత్ ఇండియాలో మాంచి ఫాలోయింగ్ ఉన్న మాస్ హీరోల్లో విజయ్ ఒకడు. గత కొన్నేళ్లలో ఇంతింతై అని ఎదిగి.. సూపర్ స్టార్ రజినీకాంత్ తర్వాత సౌత్ ఇండియాలో అత్యధిక వసూళ్లు రాబట్టే స్థాయికి చేరుకున్నాడు విజయ్. అతడి ప్రతి సినిమా మీదా సౌత్ ఇండియాలో అన్ని పరిశ్రమల వాళ్లూ ఆసక్తి చూపిస్తున్నారు ప్రస్తుతం. ఈ ఏడాది ఇప్పటికే ‘తెరి’ లాంటి బ్లాక్ బస్టర్ ఖాతాలో వేసుకున్న విజయ్.. తన తర్వాతి సినిమాను కూడా శరవేగంగా పూర్తి చేసేస్తున్నాడు. సీనియర్ డైరెక్టర్ భరతన్ దర్శకత్వంలో.. విజయా ప్రొడక్షన్స్ లాంటి లెజెండరీ ప్రొడక్షన్ హౌజ్ నిర్మాణంలో ఓ సినిమా చేస్తున్నాడు విజయ్. ఆ సినిమా టైటిల్.. ఫస్ట్ లుక్ పోస్టర్ రిలీజైంది.

భైరవ.. ఇదీ విజయ్ కొత్త సినిమా పేరు. విజయ్ కు ఇది 60వ సినిమా కావడం విశేషం. ఇందులో రెండు రకాల అవతారాల్లో కనిపిస్తున్నాడు విజయ్. ఫస్ట్ లుక్ పోస్టర్లో స్టైలిష్ గా కనిపించాడు. దీంతో పాటు అతను జుట్టు తక్కువగా.. కొంచెం బుద్ధిమంతుడి అవతారంలోనూ కనిపించబోతున్నాడు. వరుస హిట్లతో టాప్ హీరోయిన్ గా ఎదుగుతున్న కీర్తి సురేష్ ఈ చిత్రంలో కథానాయికగా నటిస్తోంది. ఇందులో మన జగపతి బాబు విలన్ పాత్ర పోషిస్తుండటం విశేషం. ‘కబాలి’ మ్యూజిక్ డైరెక్టర్ సంతోష్ నారాయణ్ సంగీతాన్నందిస్తున్నాడు. ఇదొక యాక్షన్ థ్రిల్లర్. వచ్చే ఏడాది సంక్రాంతికి ఈ చిత్రాన్ని విడుదల చేయాలని ప్లాన్ చేస్తున్నారు. ఈ చిత్రాన్ని తెలుగులోనూ విడుదల చేసే అవకాశాలున్నాయి.