శివ కార్తికేయన్ కోసం ఉక్రెనియన్ బ్యూటీని దింపిన జాతిరత్నం..!

కోలీవుడ్ వర్సటైల్ యాక్టర్ శివకార్తికేయన్ #SK20 చిత్రంతో టాలీవుడ్ లో అడుగుపెడుతున్న సంగతి తెలిసిందే. టాలెంటెడ్ డైరెక్టర్ అనుదీప్ కేవీ ఈ చిత్రానికి దర్శకత్వం వహిస్తున్నారు. 'జాతి రత్నాలు' చిత్రంతో బ్లాక్‌ బస్టర్ విజయం సాధించిన అనుదీప్.. 'వరుణ్ డాక్టర్' సక్సెస్ జోష్ లో ఉన్న శివకార్తికేయన్ కోసం అద్భుతమైన స్క్రిప్ట్‌ ను సిద్ధం చేశాడని తెలుస్తోంది.

ఇటీవలే #SK20 మూవీ సెట్స్ మీదకు వెళ్లగా.. తాజాగా మేకర్స్ సినిమాలో హీరోయిన్‌ ని ప్రకటించారు. ఇందులో హీరోయిన్ గా ఉక్రేనియన్ బ్యూటీ మరియా ర్యాబోషప్కా ఎంపికైంది. ఇంతకుముందు రెండు ఉక్రేనియన్ సినిమాల్లో నటించిన మారియా.. ప్రసిద్ధ భారతీయ వెబ్-సిరీస్ 'స్పెషల్ ఆప్స్‌' లో కీలక పాత్ర పోషించింది.

ఈ క్రమంలో ఇప్పుడు శివ కార్తికేయన్ కు జోడీగా కనిపించబోతోంది. అనౌన్స్‌మెంట్ పోస్టర్‌ లో మరియా ర్యాబోషప్కా చాలా అందంగా కనిపిస్తోంది. #SK20 విభిన్నమైన కాన్సెప్ట్‌ తో కూడిన వినోదభరితమైన రొమాంటిక్ ఎంటర్‌టైనర్ అని ప్రచారం చేయబడుతోంది.

ఇది తెలుగు మరియు తమిళంలో రూపొందే ద్విభాషా చిత్రం. భారతదేశంలోని పాండిచ్చేరి మరియు యూకేలోని లండన్ నేపథ్యంలో ఈ సినిమా కథ ఉంటుంది. ఇందులో సత్యరాజ్ కీలక పాత్ర పోషిస్తున్నారు. శ్రీ వెంకటేశ్వర సినిమాస్ ఎల్‌ఎల్‌పి - సురేష్ ప్రొడక్షన్స్ మరియు శాంతి టాకీస్ బ్యానర్‌లపై రూపొందిస్తున్నారు.

నారాయణ్ దాస్ నారంగ్ - పుస్కుర్ రామ్ మోహన్ రావు మరియు సురేష్ బాబు సంయుక్తంగా నిర్మిస్తున్నారు. అరుణ్ విశ్వ సహ నిర్మాతగా వ్యవహరిస్తున్నారు. మోస్ట్ వాంటెడ్ మ్యూజిక్ డైరెక్టర్ ఎస్ఎస్ థమన్ ఈ సినిమాకు సంగీతం సమకూరుస్తున్నారు. త్వరలోనే #SK20 చిత్రానికి సంబంధించిన ఇతర వివరాలు వెల్లడి కానున్నాయి.