త్రిష జాక్‌ పాట్‌: బాలయ్య తర్వాత...

చింతాకు కళ్ల త్రిష కెరీర్‌ 'ఎండింగే లేని ఫైటింగ్‌'లా సాగుతోంది. లయన్‌ చిత్రంలో బాలయ్య సరసన ఆడిపాడిన ఈ ముద్దుగుమ్మ మరో స్టార్‌ హీరో సరసన అవకాశం అందుకుంది. ఈసారి మాలీవుడ్‌ లో అడుగుపెడుతోంది. అక్కడ మమ్ముట్టి సరసన నటిస్తోంది. వాస్తవానికి గతంలోనే దిలీప్‌ సరసన మల్లూ బాబులకు త్రిష పరిచయం అవుతోందని ప్రచారమైనా అది సాధ్యపడలేదు. ఇన్నాళ్టికి మాలీవుడ్‌ లోనూ పాదం మోపే ఛాన్సొచ్చింది.

త్రిష దశాబ్ధం పైగానే టాలీవుడ్‌ ని ఏలింది. తెలుగు, తమిళ్‌, హిందీ పరిశ్రమల్లో కెరీర్‌ ని సాగించింది. గత ఏడాది కన్నడ డెబ్యూ మూవీ బ్లాక్‌ బస్టర్‌ హిట్‌ అయ్యింది. ఇక కన్నడలో సెటిలైనట్టే అనుకుంటున్న టైమ్‌ లో అనూహ్యంగా టాలీవుడ్‌ సీనియర్‌ హీరో బాలయ్యబాబు సరసన లయన్‌ లో నటించే అవకాశం అందుకుంది. ఆ తర్వాత తెలుగులో స్టార్‌ హీరోలెవరూ అవకాశాలివ్వకపోయినా, ఇప్పుడు మల్లూవుడ్‌ లో మమ్ముట్టి లాంటి స్టార్‌ హీరో సరసన ఛాన్స్‌ కొట్టేసింది. ఈ చిత్రంతో ఉదయ్‌ అనంతన్‌ అనే కొత్త కుర్రాడు దర్శకుడిగా పరిచయం అవుతున్నాడు. సెప్టెంబర్‌ లో సెట్స్‌ కెళ్లి, లండన్‌ లో కొంత టాకీని చిత్రీకరించనున్నారు. ఇదో అసాధారణమైన రొమాంటిక్‌ లవ్‌ స్టోరీ అని దర్శకుడు చెబుతున్నాడు.

నిజానికి ఈ అవకాశం బాలీవుడ్‌ నటి హ్యూమా ఖురేషిని వరించింది. కానీ మధ్యలోనే హ్యూమా హ్యాండిచ్చేసరికి, అనూహ్యంగా త్రిషని ఛాన్స్‌ వరించింది. అలా రొట్టె విరిగి నెయ్యిలో పడిందన్నమాట!