దర్శకుడి రక్తం తాగుతున్న హీరోగారి టీమ్!

ఆయన ఓ సక్సెస్ఫుల్ డైరెక్టర్. ఆయన ఊ అంటే చాలు.. ఎలాంటి స్టార్ హీరో అయినా డేట్స్ ఇస్తారు. అయితే ఆయన ఎరక్కపోయి ఓ స్టార్ హీరోతో ఇరుక్కున్నాడు. రెండేళ్ళు దాటింది.. సినిమా పూర్తి కావడం లేదు. దీంతో దాదాపుగా కిల్ బిల్ పాండే రేంజ్ లో ఫ్రస్ట్రేషన్ వస్తోందట. కానీ అక్కడ ఉండేది బడా స్టార్ కావడంతో కంటికి కనిపించే హీరోతో యుద్ధం చెయ్యలేక చస్తున్నాడట.

ఇప్పటికే దర్శకుడు తయారు చేసిన కథను వీలైనంతగా కిచిడి.. బిసిబేలె బాత్ చేయడంలో హీరోగారి టీమ్ వంద శాతం సక్సెస్ అయ్యారట. అది చాలదన్నట్టు గతంలో ఇదే దర్శకుడు రూపొందించిన ఓ బ్లాక్ బస్టర్ సినిమాలోని ఉండే హీరోయిజం ఎలివేషన్ల స్థాయిలో ఈ సినిమాలో హీరోయిజం సీన్లు డిజైన్ చెయ్యాలంటూ హీరోగారి టీమ్ ఒత్తిడి చేస్తున్నారట. దర్శకుడేమో ఆ కథ వేరు.. ఈ కథ వేరు.. రెండూ ఒకటి కాదు.. ఒకటి రెండు కాదు.. మూడు అసలే కాదు.. ఈ 3 ఆ మూడు కాదు అంటూ వారికి అర్థం అయ్యి.. కాని తికమక జవాబులు చెప్పి తప్పించుకుంటున్నారట.

అయితే హీరోగారి టీమ్ మహా తెలివైన వారు.. అందుకే ఇలాంటి ఎక్స్ ప్లనేషన్స్ ఏమాత్రం ఒప్పుకోకుండా మాకు అలాంటి సీన్స్ కావాలంటే కావాలని మారాం చేస్తున్నారట. ఏదేమైనా ఈ డైరెక్టర్ పైకి ఎవరికీ చెప్పుకోలేని బాధ అనుభవిస్తున్నాడని గుసగుసలు వినిపిస్తున్నాయి.