బాలరాజు బంగారిల పరీక్ష నేడే

చిన్న సినిమాల అదృష్టం ప్లస్ కంటెంట్ రాజ్యమేలుతున్న ట్రెండ్ లో ఈ రోజు మరో ప్రేమ కథ బాక్స్ ఆఫీస్ దగ్గర అదృష్టాన్ని పరీక్షించుకుంటోంది. అదే బంగారి బాలరాజు. రాములమ్మ సీరియల్ ద్వారా పేరు తెచ్చుకున్న చైల్డ్ ఆర్టిస్ట్ కారుణ్య హీరోగా రూపొందిన ఈ మూవీకి కోటెంద్ర దుద్యాల దర్శకుడు. ఈయన గతంలో నంది అవార్డు గ్రహీత. రాఘవేంద్ర రెడ్డి-రఫీల జంట నిర్మాణంలో రూపొందిన బంగారి బాలరాజు పూర్తి స్థాయి గ్రామీణ వాతావరణంలో రూపొందిన లవ్ స్టోరీ. టీనేజ్ ప్రేమలో పడిన ఓ జంటకు అమ్మాయి తండ్రి వల్ల ఎలాంటి సమస్యలు వచ్చాయి వాటిని హీరో ఎలా ఎదురుకుని తన ప్రేమను గెలిపించుకున్నాడు అనే పాయింట్ తో ఇది రూపొందింది. ట్రైలర్ లో ఇది స్పష్టంగా తెలిసేలాగే కట్ చేసారు. సహజత్వంతో కూడిన ప్రేమ కథలకు ఈ మధ్య కాలంలో బాగా ఆదరణ దక్కుతున్న నేపధ్యంలో దీని విజయం పట్ల నిర్మాతలు ధీమాగా ఉన్నారు.

వీరభోగవసంతరాయలుతో పాటు మరో డబ్బింగ్ సినిమా మాత్రమే పోటీ ఉన్న నేపథ్యంలో బంగారి బాలరాజు యూత్ కి మంచి ఛాయస్ గా నిలుస్తుందని నిర్మాతలు ఆశాభావంతో ఉన్నారు. కాకపోతే శుక్రవారం బదులు ఇవాళే గురువారం విడుదల చేస్తున్నారు. చిన్ని కృష్ణ సంగీతం అందించిన ఈ మూవీకి చక్రవర్తి ఛాయాగ్రహణం అందించారు. మొత్తం గ్రామీణ వాతావరణంలో రూపొందిన ఈ మూవీలో హీరో హీరోయిన్ ఇద్దరూ కొత్తవారే. సీనియర్ ఆర్టిస్టులను సపోర్టింగ్ రోల్స్ లో తీసుకున్న ఈ బంగారి బాలరాజు ప్రేమతో పాటు బాక్స్ ఆఫీస్ యుద్ధంలో గెలుస్తారో లేదో ఈ రోజు తేలిపోతుంది. నంది క్రియేషన్స్ బ్యానర్ పై లవర్ ఈజ్ బ్యాక్ ట్యాగ్ లైన్ తో ఇది రూపొందింది.