దుబాయ్ దారిలో టాలీవుడ్!!

టాలీవుడ్ సినిమాలు ఫారిన్ లొకేషన్స్ లో తీయడం ఎప్పటి నుంచో జరుగుతున్నదే. అయితే.. ఒక్కోసారి ఒక్కో ఏరియాపై మనసు పడుతూ ఉంటారు మేకర్స్. ఒక సినిమాని ఏదైనా కొత్త లొకేషన్ లో చిత్రీకరిస్తుంటే.. ఆ తర్వాత వరుసగా పలు సినిమాలు అదే ప్రాంతానికి క్యూ కట్టేస్తూ ఉంటాయి.

ఇప్పుడు గోపీచంద్.. హన్సికలు జంటగా గౌతమ్ నందా చిత్రంలో నటిస్తున్నారు. సంపత్ నంది దర్శకత్వంలో రూపొందిన ఈ మూవీపై ఆసక్తితో పాటు అంచనాలు కూడా ఎక్కువగానే ఉన్నాయి. ఇప్పుడీ గౌతమ్ నందా టాకీ పార్ట్ షూటింగ్ పూర్తయినట్లు మేకర్స్ అధికారికంగా ప్రకటించారు. ఇంకా కేవలం రెండు పాటలను మాత్రమే షూటింగ్ చేయాల్సి ఉండగా.. మరికొన్ని రోజుల్లోనే వీటిని దుబాయ్ లో చిత్రీకరించబోతున్నట్లు కూడా అనౌన్స్ చేశారు. మే నెలలో గౌతమ్ నందా మూవీని రిలీజ్ చేయబోతున్నట్లు వెల్లడించారు మేకర్స్.

ఇప్పటికే అల్లు అర్జున్-హరీష్ శంకర్ కాంబినేషన్ లో రూపొందుతోన్న డీజే-దువ్వాడ జగన్నాధం చిత్రాన్ని అబుదాబిలో చిత్రీకరిస్తున్న సంగతి తెలిసిందే. ఓ పాటతో పాటు.. కొన్ని ప్రధానమైన సన్నివేశాల చిత్రీకరణ కూడా జరుగుతోంది. గల్ఫ్ కంట్రీస్ కి వరుసగా క్యూ కట్టేస్తున్నారు మన మేకర్స్. దుబాయ్.. అబుదాబి వంటి గల్ఫ్ దేశాల అందాలను కెమేరాల్లో ఒడిసిపట్టేందుకు కారణం.. ఆయా దేశాలు ఫారిన్ సినిమా షూటింగ్ లకు అందిస్తున్న సహకారమే అని తెలుస్తోంది.


Like Us on Facebook : https://www.facebook.com/Tupakidotcom/