ఫాంటసీ లవ్ స్టోరీగా తేజ సజ్జా 'అద్భుతం'

'జాంబీరెడ్డి' సినిమాతో హీరోగా పరిచయమైన తేజ సజ్జా.. వరుస సినిమాలతో జోరు మీదున్నాడు. ఇప్పటికే మెగా సూపర్ గుడ్ ఫిలిమ్స్‌ బ్యానర్ పై 'ఇష్క్'-'నాట్‌ ఎ లవ్‌ స్టోరీ' సినిమా కంప్లీట్ చేశాడు. ఎస్‌.ఎస్‌. రాజు దర్శకత్వం వహించిన ఈ సినిమా విడుదలకు సిద్ధంగా ఉంది. ఇటీవలే ప్రశాంత్ వర్మ దర్శకత్వంలో 'హను-మాన్' అనే మరో సినిమా ప్రారంభించాడు. అలానే మల్లిక్ రామ్ డైరెక్షన్ లో ఓ సినిమా చిత్రీకరణ పూర్తి చేశాడు తేజ. ఇందులో శివానీ రాజశేఖర్ హీరోయిన్ గా నటిస్తోంది. ఇప్పటికే విడుదలైన ప్రచార చిత్రాలు సినిమాపై ఆసక్తిని కలిగించాయి.

తాజాగా ఈ చిత్రానికి ''అద్భుతం'' అనే టైటిల్ ను ఖరారు చేసినట్లు మేకర్స్ అధికారికంగా ప్రకటించారు. ఈ సందర్భంగా ''అద్భుతం'' చిత్రానికి సంబంధించిన ఓ ఆకర్షణీయమైన పోస్టర్ ను చిత్ర బృందం విడుదల చేశారు. తేజ - శివాని ఇద్దరూ ఓ టేబుల్ పై కూర్చొని టైం చూసుకుంటున్నట్లుగా మిర్రర్ ఇమేజ్ స్టైల్ లో ఈ పోస్టర్ డిజైన్ చేయబడింది. ఇది ఫాంటసీ లవ్ స్టోరీ నేపథ్యంలో రూపొందిస్తున్న సినిమా అని తెలుస్తోంది. దీనికి ప్రశాంత్ వర్మ కథ అందించగా.. లక్ష్మీ భూపాల స్క్రీన్ ప్లే - మాటలు రాస్తున్నారు. రథన్ సంగీతం సమకూరుస్తున్నారు. విద్యాసాగర్ చింతా సినిమాటోగ్రఫీ.. గ్యారీ బీహెచ్ ఎడిటింగ్ వర్క్ చేస్తున్నారు.

మహాతేజ క్రియేషన్స్ మరియు ఎస్.ఒరిజినల్స్ బ్యానర్స్ పై ఈ సినిమా రూపొందుతోంది. చంద్ర శేఖర్ మొగుల్ల - సృజన్ ఎరబోలు నిర్మాతలుగా వ్యవహరిస్తున్నారు. ఇందులో తులసి - శివాజీ రాజా - సత్య - మిర్చి కిరణ్ - దేవీ ప్రసాద్ తదితరులు ఇతర ప్రధాన పాత్రలు పోషిస్తున్నారు. ఇప్పటికే పోస్ట్ ప్రొడక్షన్ కార్యక్రమాలు పూర్తి చేసుకున్న 'అద్భుతం' చిత్రాన్ని త్వరలోనే ప్రేక్షకుల ముందుకు తీసుకురాడానికి మేకర్స్ సన్నాహాలు చేస్తున్నారు.