డ్రగ్స్ కేసులో దివంగత సుశాంత్ సింగ్ ఫ్రెండ్ అరెస్ట్..!

బాలీవుడ్ యువ హీరో సుశాంత్ సింగ్ రాజ్ పుత్ మరణం తర్వాత వెలుగు చూసిన డ్రగ్స్ మాఫియా కేసులో నార్కోటిక్ కంట్రోల్ బ్యూరో(ఎన్‌సీబీ) అధికారులు లోతుగా విచారిస్తున్న సంగతి తెలిసిందే. ఇప్పటికే పలువురు సెలబ్రిటీలను విచారించడంతో పాటు అరెస్ట్ కూడా చేశారు. ఈ క్రమంలో తాజాగా దివంగత సుశాంత్ సింగ్ రాజ్‌ పుత్ స్నేహితుడు, సహాయ దర్శకుడు రిషికేశ్ పవార్‌ ను నార్కోటిక్ కంట్రోల్ బ్యూరో అధికారులు అరెస్ట్ చేసినట్లు తెలుస్తోంది.

అంతకుముందు ఎన్సీబీ అధికారులు రిషికేశ్ పవార్‌ ఇంటిపై దాడిచేసి ల్యాప్‌ టాప్ మరియు హార్డ్ డిస్క్ డ్రైవ్‌ లను స్వాధీనం చేసుకున్నట్లు తెలుస్తోంది. ఈ నేపథ్యంలోనే పవార్‌ ని అరెస్ట్ చేసినట్లు తెలుస్తోంది. అతనిపై డ్రగ్స్ వినియోగం.. సరఫరా చెయ్యడం వంటి ఆరోపణలు ఉన్నాయి. సుశాంత్‌ సింగ్ కు కూడా అతడు డ్రగ్స్ సరఫరా చేసినట్టు సుశాంత్ గర్ల్ ఫ్రెండ్ రియా చక్రవర్తి కూడా తన వాంగ్మూలంలో పవార్ పేరును వెల్లడించినట్టు వార్తలు వచ్చిన విషయం తెలిసిందే.