చప్పుడే లేదేంటి రజనీ?

సూపర్ స్టార్ రజనీకాంత్ సినిమా ఒకటి వచ్చి ఫ్లాప్ అయినా.. ఆయన తర్వాతి సినిమాపై ఆ ప్రభావం ఏమీ కనిపించదు. ఆటోమేటిగ్గా రజనీ కొత్త సినిమాకు క్రేజ్ వచ్చేస్తుంది. రజనీ పారితోషకం పెరుగుతుంది. బడ్జెట్లు పెరుగుతాయి. బిజినెస్ కూడా పెరుగుతుంది. సినిమా రిలీజ్ ముంగిట హైప్ కూడా మామూలుగా ఉండదు. కానీ ‘కాలా’ విషయంలో మాత్రం అలా జరుగుతున్నట్లు లేదు. ‘కబాలి’ కాంబినేషన్లో వస్తున్న ఈ చిత్రానికి అటు తమిళంలో.. ఇటు తెలుగులో ఏమంత క్రేజ్ కనిపించడం లేదు. ‘కబాలి’ తెలుగుతో పోలిస్తే తమిళంలో ఓ మోస్తరుగా ఆడింది. అయినప్పటికీ ‘కాలా’పై అంచనాలు తక్కువగానే ఉన్నాయి. ఇక తెలుగులో అయితే ఈ చిత్రం గురించి డిస్కషనే లేదసలు. రెండేళ్ల కిందట ఈ సమయానికి జనాలంతా ‘కబాలి’ ఫీవర్ తో ఊగిపోతూ కనిపించారు. ఇక రిలీజ్ ముంగిట హైప్ గురించి ప్రత్యేకంగా చెప్పాల్సిన పని లేదు.

ఐతే ‘కబాలి’ ప్రేక్షకుల్ని తీవ్ర నిరాశకు గురి చేసింది. ఆ ప్రభావం ‘కాలా’ మీద పడింది. దీనికి మొదట్నుంచి హైప్ లేదు. పైగా ‘కబాలి’తో పోలిస్తే ఇందులో తమిళ నేటివిటీ ఇంకా ఎక్కువగా కనిపిస్తోంది. టీజర్ జనాల్లో ఎలాంటి ఎగ్జైట్మెంట్ కలిగించకపోగా.. దీని ఆడియో కూడా అలాగే తయారైంది. పూర్తిగా అరవ నేటివిటీతో నిండిపోయినట్లుగా కనిపించిన ఈ ఆడియో గురించి డిస్కషనే లేదసలు. మొత్తంగా సినిమా విడుదలకు ఇంకో మూడు వారాలు మాత్రమే సమయం ఉండగా.. ‘కాలా’కు ఎలాంటి హైప్ కనిపించడం లేదు. ఇంతకుముందు రజనీ చేసిన యానిమేషన్ మూవీ ‘విక్రమ సింహా’ వషయంలో మాత్రమే ఇలాంటి పరిస్థితి కనిపించింది. మరి తక్కువ అంచనాల మధ్య విడుదల కాబోతున్న ‘కాలా’.. ఆ అంచనాలకు భిన్నంగా ఫలితం సాధిస్తుందేమో చూద్దాం.