చెర్రీ-సుక్కు కోసం హీరోయిన్ ఆడిషన్

మెగా పవర్ స్టార్ అండ్ ఇంటెలిజెంట్ డైరెక్టర్ కాంబినేషన్ లో ఓ మూవీ తెరకెక్కనుందనే న్యూస్ ముందు నుంచీ వినిపిస్తోంది. నవంబర్ ఎండింగ్ లేదా డిసెంబర్ మొదటి వారం నుండి రామ్ చరణ్‌ అండ్ సుకుమార్ షూటింగ్ కు వెళ్తారని కూడా టాక్ ఉంది. ప్రస్తుతం ధృవ షూటింగ్ ని ఫినిష్ చేసే పనిలో బిజీగా ఉన్న రామ్ చరణ్.. ఆ చిత్రం రిలీజ్ కాగానే.. సుక్కు సినిమాను స్టార్ట్ చేసేయనున్నాడు.

ఇప్పుడీ మూవీకి హీరోయిన్ ని ఫైనల్ చేసేందుకు సుకుమార్ ప్రయత్నిస్తున్నాడు. టాలీవుడ్ యంగ్ బ్యూటీస్ లో ఒకరైన రాశి ఖన్నాను పరిశీలిస్తున్నాడట సుకుమార్. ఇక రామ్ చరణ్ కూడా అంగీకరించడంతో.. తాజాగా ఆడిషన్ కూడా జరిపారని తెలుస్తోంది. చెర్రీ-సుక్కులు ఓ పక్కా పల్లెటూరి ప్రేమకథను ప్రేక్షకులను అందించబోతున్నారు. ఈ లవ్ స్టోరీలో గ్రామీణ ప్రాంత యువతిగా హీరోయిన్ పాత్ర చాలా ముఖ్యం. అచ్చమైన తెలుగింటి అమ్మాయి లుక్స్ కచ్చితంగా ఉండాలన్నది మెయిన్ కండిషన్.

అందుకే హీరోయిన్ విషయంలో ఆడిషన్స్ చేసి మరీ ఫైనల్ చేయాలని నిర్ణయించారట. రాశి ఖన్నా ఆడిషన్ పూర్తి చేసినా.. ఇంకా తుది నిర్ణయం మాత్రం చెప్పలేదని తెలుస్తోంది. అయితే.. అటు చరణ్.. ఇటు సుకుమార్ లు ఇద్దరూ రాశి ఖన్నాకు ఛాన్స్ ఇచ్చేందుకు మొగ్గు చూపుతున్నారనే టాక్ ఉంది. ఒకవేళ ఈ ఆఫర్ దక్కితే మాత్రం.. చేతిలో ఆక్సిజన్ తప్ప మరో తెలుగు సినిమా లేని ఈ బ్యూటీకి మెగా బ్రేక్ వచ్చేసినట్లే.

Like Us on Facebook : https://www.facebook.com/Tupakidotcom/