మెగాఫోన్ చేపట్టనున్న స్టార్ స్టంట్ మాస్టర్

సినీ పరిశ్రమలో ఒక శాఖలో సక్సెస్ సాధించినవారు మరో డిపార్ట్ మెంట్లో తమ అదృష్టాన్ని పరీక్షించుకోవడం ఎప్పటినుంచో ఉంది. రైటర్లు డైరెక్టర్లు అవుతారు.. డైరెక్టర్లు ప్రొడ్యూసర్లు అవుతారు.. సినిమాటోగ్రాఫర్లు కూడా దర్శకత్వంవైపు అడుగులు వేస్తారు. స్టంట్ మాస్టర్లు కూడా డైరెక్టర్లుగా మారుతూ ఉంటారు. తాజాగా మరో స్టంట్ మాస్టర్ మెగాఫోన్ చేతబట్టేందుకు రెడీ అవుతున్నారు.

ఆయన ఎవరో కాదు యాక్షన్ సీక్వెన్సులను కొత్త పుంతలు తొక్కించిన పీటర్ హెయిన్స్. 'అపరిచితుడు' .. 'శివాజీ'.. 'గజినీ'.. 'రోబో'.. 'బాహుబలి' లాంటి ఎన్నో అద్భుతమైన చిత్రాలకు ఆయన స్టంట్ మాస్టర్ గా పని చేశారు. మోహన్ లాల్ 'పులి మురుగన్'(మన్యం పులి) చిత్రానికి ఆయన బెస్ట్ స్టంట్ కొరియోగ్రాఫర్ గా నేషనల్ అవార్డు కూడా అందుకున్నారు. తాజాగా పీటర్ డైరెక్టర్ గా మారేందుకు సన్నాహాలు చేసుకుంటున్నారట. ఈ సినిమాను ప్రముఖ నిర్మాత నల్లమలపు బుజ్జి నిర్మిస్తారని సమాచారం.

ఈ సినిమాలో హీరో హీరోయిన్లు ఎవరు.. యాక్షన్ ప్రధానంగా ఉంటుందా.. ఇలాంటి వివరాలు ఇంకా తెలియాల్సి ఉంది. మరి స్టంట్ మాస్టర్ గా ఫిలిం ఇండస్ట్రీలో తనదైన ముద్ర వేసిన పీటర్ హెయిన్స్ దర్శకుడిగా కూడా తన సత్తా చాటుతారా లేదా అనేది వేచి చూడాలి.