ఉస్తాద్ సెట్ లో ప్రత్యక్షమైన స్టార్ డైరెక్టర్ శంకర్..!

స్టార్‌ డైరెక్టర్‌ శంకర్‌ దర్శకత్వంలో మెగా పవర్ స్టార్ రామ్‌ చరణ్‌ హీరోగా ఓ చిత్రం తెరకెక్కనున్న సంగతి తెలిసిందే. శ్రీ వేంకటేశ్వర క్రియేషన్స్‌ పతాకంపై దిల్‌ రాజు - శిరీష్ కలిసి ఈ సినిమా నిర్మిస్తున్నారు. త్వరలోనే ఈ చిత్రం సెట్స్‌ పైకి వెళ్లనుంది. '#RC15' చిత్రానికి సంబంధించిన ప్రీ ప్రొడక్షన్ పనులు చూసుకుంటున్న శంకర్.. ప్రస్తుతం హైదరాబాద్ లో ఉన్నారు. ఈ నేపథ్యంలో '#RAPO19' సెట్స్ కు వెళ్లి చిత్ర బృందాన్ని సర్ప్రైజ్ చేశారు శంకర్.

ఎనర్జిటిక్ హీరో 'ఉస్తాద్' రామ్ పోతినేని - లింగుస్వామి కాంబినేషన్ లో ఓ యాక్షన్ ఎంటర్టైనర్ రూపొందుతున్న సంగతి తెలిసిందే. తెలుగు, తమిళ భాషలలో వస్తున్న ఈ బైలింగ్విల్ లో 'ఉప్పెన' ఫేమ్ కృతి శెట్టి హీరోయిన్‌ గా నటిస్తోంది. సీనియర్ నటి నదియా కీలక పాత్రలో నటిస్తున్నారు. ఇటీవలే స్టార్ట్ అయిన ఈ సినిమా షూటింగ్ ప్రస్తుతం హైదరాబాద్ లో జరుగుతోంది. ఈ నేపథ్యంలో దర్శకుడు లింగుస్వామి తో సన్నిహితంగా ఉండే శంకర్.. '#RAPO19' సెట్స్ ను సందర్శించి చిత్ర బృందానికి విషెస్ అందించారు. ఈ సందర్భంగా చిత్రంలోని ఓ మెలోడీ పాటను విన్న శంకర్.. చాలా బాగుందని చెప్పారని తెలుస్తోంది. అలానే కొద్దిసేపు అక్కడే గడిపి.. గత రెండు రోజులుగా షూట్ చేసిన రషెస్ చూశారు.

'#RAPO19' సెట్స్ లో శంకర్ ఉన్న ఫోటోలను చిత్ర యూనిట్ సోషల్ మీడియాలో షేర్ చేసింది. ఈ ఫొటోలలో దర్శకుడు శంకర్ కు హీరో రామ్ ఫ్లవర్ బొకే ఇస్తూ కనిపిస్తున్నారు. ఇందులో హీరోయిన్ కృతి శెట్టి - దర్శకుడు లింగుస్వామి - నదియా లతో పాటుగా చిత్ర నిర్మాతలు ఉన్నారు. కాగా, రామ్ -లింగుస్వామి చిత్రాన్ని శ్రీనివాస సిల్వర్ స్క్రీన్ పతాకంపై శ్రీనివాస్ చిట్టూరి నిర్మిస్తున్నారు.