చరణ్ చేయలేదు.. బన్నీ చేస్తాడా?

మిడిల్ క్లాస్ హీరోగా ఒకప్పుడు దశాబ్దం పాటు చక్రం తిప్పాడు శ్రీకాంత్. ఐతే ట్రెండుకు తగ్గట్లు అప్ డేట్ కాకపోవడంతో హీరోగా ఆయన ఫేట్ మారిపోయింది. ఫేడవుట్ అయిపోయాడు. ఐతే తన మార్కెట్ పూర్తిగా పడిపోయినా హీరో వేషాలు మాత్రం మానలేదు శ్రీకాంత్. అప్పటికే పెద్ద హీరోల సినిమాల్లో క్యారెక్టర్ రోల్స్ చేసినప్పటికీ.. ఆ తరహా అవకాశాలు కూడా పెద్దగా రాకపోవడంతో హీరోగా కంటిన్యూ అవుతున్నాడు. జగపతి బాబుకు వచ్చినట్లు మంచి బ్రేక్ వస్తే కానీ శ్రీకాంత్ హీరో వేషాలకు స్వస్తి చెప్పేసి అటు మళ్లడేమో. రామ్ చరణ్ హీరోగా నటించిన ‘గోవిందుడు అందరి వాడేలే’తో తన కెరీర్ మలుపు తిరుగుతుందని ఆశించాడు కానీ.. ఆ ఆశ నెరవేరలేదు.

ఇప్పుడు అల్లు అర్జున్ మీదే ఆశలు పెట్టుకున్నాడు శ్రీకాంత్. ‘సరైనోడు’ సినిమాలో ఈ సీనియర్ హీరో ఓ కీలక పాత్ర పోషిస్తున్నాడు. ‘గోవిందుడు..’లో చరణ్ కు బాబాయిగా నటించిన శ్రీకాంత్.. ‘సరైనోడు’లో బన్నీకి కూడా బాబాయే అంటున్నారు. ఐతే శ్రీకాంత్ ఇంతకుముందు క్యారెక్టర్ రోల్స్ చేసిన సినిమాల తరహాలో కాకుండా.. ‘సరైనోడు’లో ఆయన పాత్ర పవర్ ఫుల్ గా ఉంటుందని, బోయపాటి ఆయన పాత్రను ప్రత్యేకంగా తీర్చిదిద్దాడని అంటున్నారు. మరి ఈ పాత్ర అయినా శ్రీకాంత్ కోరుకున్న బ్రేక్ ఇస్తుందేమో చూడాలి. గీతా ఆర్ట్స్ నిర్మిస్తున్న ఈ చిత్రం ఏప్రిల్ నెలాఖరులో ప్రేక్షకుల ముందుకొచ్చే అవకాశముంది. ఇప్పటికే సరైనోడు ఫస్ట్ లుక్ పోస్టర్ - టీజర్ ప్రకంపనలు రేపుతున్న సంగతి తెలిసిందే.