మెగా డాటర్ డెబ్యూ మూవీ 'శ్రీదేవి శోభన్ బాబు' ఫస్ట్ లుక్..!

మెగాస్టార్‌ చిరంజీవి పెద్ద కుమార్తె సుష్మిత నిర్మాతగా మారిన సంగతి తెలిసిందే. తన భర్త విష్ణు ప్రసాద్ తో కలిసి సుష్మిత 'గోల్డ్‌ బాక్స్‌ ఎంటర్టైన్మెంట్స్' అనే నిర్మాణ సంస్థను ప్రారంభించారు. తొలి ప్రయత్నంగా 'షూట్-అవుట్ ఎట్ ఆలేరు' అనే క్రైమ్ థ్రిల్లర్ వెబ్ సిరీస్ ని నిర్మించింది. ఈ క్రమంలో ఇప్పుడు ''శ్రీదేవి శోభన్ బాబు'' అనే టైటిల్ తో ఫస్ట్ ఫీచర్ ఫిల్మ్ ని నిర్మిస్తున్నారు.

రేపు చిరంజీవి పుట్టినరోజు సందర్భంగా ఆయనకు శుభాకాంక్షలు తెలియజేస్తూ.. ఈరోజు శనివారం ''శ్రీదేవి శోభన్ బాబు'' సినిమా టైటిల్ & ఫస్ట్ లుక్ పోస్టర్ ని విడుదల చేశారు. 'ఏక్ మినీ కథ' సినిమాతో సూపర్ హిట్ అందుకున్న సంతోష్ శోభన్ ఈ చిత్రంలో హీరోగా నటిస్తున్నాడు. ఇందులో 'జాను' ఫేమ్ గౌరీ కిషన్ హీరోయిన్. ప్రశాంత్ కుమార్ దిమ్మల ఈ చిత్రానికి దర్శకత్వం వహిస్తున్నారు.

తాజాగా విడుదలైన 'శ్రీదేవి శోభన్ బాబు' ఫస్ట్ లుక్ పోస్టర్ లో బ్యాగ్రౌండ్ లో ఓ ఇల్లు పెయింటింగ్ కనిపిస్తుండగా.. సంతోష్ - గౌరీ ఒకరినొకరు ప్రేమగా దగ్గరకు తీసుకొని ఉన్నారు. గౌరీ ట్రెండీ కాస్ట్యూమ్స్ లో ఉండగా.. సంతోష్ మాత్రం ఫార్మర్ షర్ట్ లో రఫ్ గడ్డంతో మిడిల్ క్లాస్ యువకుడిగా కనిపిస్తున్నాడు. మరి ఈ శ్రీదేవి - శోభన్ బాబు ల కథ ఏంటో తెలియాలంటే ఇంకొన్ని రోజులు ఆగాల్సిందే.

'శ్రీదేవి శోభన్ బాబు' చిత్రానికి సంబంధించిన నటీనటులు సాంకేతిక నిపుణులు వంటి ఇతర వివరాలు తెలియాల్సి ఉంది. గోల్డ్‌ బాక్స్‌ ఎంటర్టైన్మెంట్స్ బ్యానర్ పై విష్ణు ప్రసాద్ - సుష్మిత కొణిదెల ఈ చిత్రాన్ని నిర్మిస్తున్నారు. తండ్రి చిరంజీవికి కాస్ట్యూమ్‌ డిజైనర్‌ గా వర్క్ చేసిన మెగా డాటర్ సుష్మిత.. ప్రొడ్యూసర్ గా ఎలాంటి గుర్తింపు తెచ్చుకుంటుందో చూడాలి.