ట్రైలర్ టాక్: సూపర్ స్టార్ నయా అవతార్

సూపర్ స్టార్ కృష్ణ బ్యాంగ్ బ్యాంగ్ రీఎంట్రీకి రెడీ అవుతున్నారు. 50 ఏళ్ల సినీ ప్రస్థానాన్ని పూర్తి చేసుకుంటున్న తరుణంలో ఆయన కథానాయకుడిగా నటించిన కొత్త సినిమా ‘శ్రీ శ్రీ’ విడుదలకు సిద్ధమైంది. శుక్రవారం ఆడియో వేడుకలో ఈ సినిమా థియేట్రికల్ ట్రైలర్ కూడా రిలీజ్ చేశారు. ఇంతకుముందు హీరో కెరీర్ ముగించబోతూ చెత్త చెత్త సినిమాలన్నీ చేసిన కృష్ణ.. ఈసారి మంచి కంటెంట్ ఉన్న సినిమానే ఎంచుకున్నట్లున్నారు. ఓ మరాఠీ సినిమాకు రీమేక్ గా వస్తున్న ఈ సినిమా ఓ రివెంజ్ డ్రామా అని.. ట్రైలర్ తో హింట్ ఇచ్చేశారు. కొన్ని ప్రతీకార కథలు ఎప్పటికీ పాతబడవు అన్న ట్యాగ్ లైన్ చూస్తేనే సినిమా కాన్సెప్ట్ ఏంటన్నది అర్థమైపోతుంది.

తనకు జరిగిన అన్యాయం మీద పోరాటం మొదలుపెట్టిన ఓ పెద్ద మనిషి కథ ఇది. ‘‘సిస్టమ్ ఫెయిలైనపుడు సొసైటీ నుంచి నాలాంటి శ్రీశ్రీలే పుట్టుకొస్తార్రా’’ అంటూ కృష్ణ చెప్పే ఒక్క డైలాగ్ మాత్రమే ఉంది ట్రైలర్లో. మిగతా అంతా బ్యాగ్రౌండ్ స్కోర్ తోనే నడిపించారు. కృష్ణతో పాటు విజయనిర్మల - సాయికుమార్ - మురళీ శర్మ ఇందులో ముఖ్య పాత్రలు పోషించారు. కృష్ణ గత సినిమాలతో పోలిస్తే ఇందులో గెటప్ చాలా కొత్తగా, బాగా అనిపిస్తోంది. ఫైట్లు అవేమీ లేకుండా థ్రిల్లర్ తరహాలో సినిమాను రూపొందించినట్లున్నారు. సీనియర్ డైరెక్టర్ ముప్పలనేని శివ ఈ చిత్రానికి దర్శకుడు. మార్చిలోనే ‘శ్రీ శ్రీ’ ప్రేక్షకుల ముందుకు రానుంది.