రవితేజతో ఎస్జే సూర్య?

ఎస్జే సూర్య ఇప్పుడు దర్శకుడిగా కంటే నటుడిగా బాగా ఫేమస్. తమిళంలో ‘ఇరైవి’ సినిమాలో అద్భుతంగా నటించి గొప్ప పేరు సంపాదించాడతను. ఈ దెబ్బతో దర్శకత్వం పూర్తిగా పక్కన పెట్టేసి నటుడిగా బిజీ అయిపోయాడు. తమిళంలో అతడి చేతిలో ఐదారు సినిమాలున్నాయి. తెలుగులో కూడా అతను బిజీ అయ్యే అవకాశాలు కనిపిస్తున్నాయి. ఎందుకంటే మహేష్ బాబు లాంటి సూపర్ స్టార్.. మురుగదాస్ లాంటి స్టార్ డైరెక్టర్ కాంబినేషన్లో తెరకెక్కిన భారీ బడ్జెట్ సినిమా ‘స్పైడర్’లో అతనే ప్రధాన విలన్. సూర్య పాత్ర గురించి చిత్ర బృందం చెబుతున్న మాటలు చూస్తుంటే ఆ పాత్ర సెన్సేషన్ క్రియేట్ చేసేలా ఉంది.

‘స్పైడర్’ టీం నుంచి అందిన ఫీడ్ బ్యాక్ తోనే ఎస్జే సూర్యకు ఆల్రెడీ వేరే తెలుగు సినిమాల్లో ఆఫర్లు వస్తున్నట్లు సమాచారం. ఇందులో మాస్ రాజా రవితేజ నటించబోయే ఓ క్రేజీ ప్రాజెక్టు కూడా ఉన్నట్లు సమాచారం. తమిళంలో జయం రవి-అరవింద్ స్వామిల క్రేజీ కాంబినేషన్లో వచ్చిన ‘బోగన్’ సినిమా తెలుగు రీమేక్ కోసం సూర్యను అడిగారట. తమిళంలో రవి చేసిన పాత్రను రవితేజ చేయనున్నాడు. అరవింద్ స్వామిని తెలుగులోనూ నటించమని అడిగితే.. అతను నో చెప్పాడట. ఈ పాత్రకే సూర్యను అడగ్గా అతను పాజిటివ్ గానే స్పందించినట్లు సమాచారం. ఈ చిత్రానికి దర్శకుడెవరన్నది త్వరలోనే తేలుతుంది. ‘స్పైడర్’ విడుదలకు ముందే సూర్యకు టాలీవుడ్లో డిమాండ్ ఉందంటే.. ఈ సినిమా విడుదలై అతడి పాత్రకు మంచి పేరొస్తే బాగా బిజీ అయిపోతాడేమో.