శింబు అభిమాని అతి చూశారా?

సినీ హీరోలపై అభిమానం ఒక స్థాయి వరకు బాగానే ఉంటుంది. కానీ అది మరీ హద్దులు దాటితనే కష్టం. కొందరు అభిమానాన్ని మరీ తలకెక్కించుకుని శ్రుతి మించి పోతుంటారు. తమ జీవితాల్ని కూడా పణంగా పెట్టేయడానికి సిద్ధ పడిపోతుంటారు. తమ హీరోల సినిమాలు రిలీజవుతుంటే థియేటర్ల దగ్గర చేసే హంగామాతో ప్రాణాల మీదికి తెచ్చుకున్న అభిమానులు చాలామందే ఉన్నారు. తాజాగా తమిళ స్టార్ హీరో శింబు అభిమాని ఒకరు ఇలాగే చేశాడు. మణిరత్నం దర్శకత్వంలో శింబు నటించిన కొత్త సినిమా ‘చెక్క చివంత వానమ్’ ఇటీవలే విడుదలైన సంగతి తెలిసిందే.

ఈ సందర్భంగా శింబు అభిమాని ఒకరు చేసిన సాహసం ఒళ్ళు గగుర్పొడిచేలా ఉంది. ఈ ఘటన తమిళనాడులోని వేలూరులో జరిగింది. ఆ అభిమాని శింబు కటౌట్ కు పాలాభిషేకం చేయడానికి పెద్ద సాహసమే చేశాడు. అతను క్రేన్ కు వేలాడుతూ కటౌట్ పైకి చేరుకొని పాలాభిషేకం చేశాడు. కింద అభిమానులు డప్పులు వాయిస్తూ పెద్దఎత్తున సంబరాలు చేశారు. దీనికి సంబంధించిన వీడియో సామాజిక మాధ్యమాల్లో వైరల్ అవుతోంది. అభిమానం మరీ ఈ స్థాయిలో ఉండకూదంటూ విమర్శలు వ్యక్తమవుతున్నాయి. స్టార్ హీరోలు ఇలాంటి వాటిని ఖండించాలని.. శింబు కూడా స్పందించాలని డిమాండ్ చేస్తున్నారు. ఈ సంగతలా ఉంచితే ‘చెక్క చివంత వానం’ తమిళంలో పెద్ద హిట్టే అయింది. శింబుకు కూడా మంచి పేరొచ్చింది.