చంపేస్తానంటున్నాడు.. శృతి హాసన్ కంప్లెయింట్

సెలబ్రిటీలు సోషల్ మీడియాలో హల్ చల్ చేయడం మొదలైనప్పటి కంటే ముందే.. వారిని వేధింపులకు గురి చేసే అలవాటు చాలామందికి ఉంది. హీరోయిన్లకు ఈ విషయంలో మరిన్ని బాధలు ఎక్కువ. ట్విట్టర్.. ఫేస్ బుక్ లాంటి సోషల్ నెట్వర్కింగ్ సైట్లలో.. వీరిపై అభిమానంతో చేసే ట్వీట్స్ కంటే.. వెర్రి కొద్దీ చేసే వెకిలి కామెంట్స్ ఎక్కువగా ఉంటాయి. ఇలాంటి వాటిని చాలామంది హీరోయిన్స్ పెద్దగా పట్టించుకోరు కానీ.. మరీ శృతి మించితే మాత్రం.. శృతి హాసన్ లాగానే చేయాల్సి వస్తుంది.

కర్నాటకకు చెందిన కే జీ గురుప్రసాద్ అనే డాక్టర్ పై శృతి హాసన్ పోలీస్ కంప్లెయింట్ ఇచ్చింది. తనను చంపేస్తానని బెదిరించినట్లు ఫిర్యాదు చేసింది శృతి హాసన్. రెండు పేజీల కంప్లెయింట్ ను చెన్నై సిటి పోలీస్ కమీషనర్ సమక్షంలో సైబర్ క్రైమ్ విభాగానికి.. తన ప్రతినిధి ప్రవీణ్ ఆంటోనీ అనే వ్యక్తితో ఇప్పించింది శృతి.

వేధింపులకు గురి చేస్తున్నాడని.. నీచమైన మాటలు ఉపయోగిస్తున్నాడని.. చెప్పుకోలేని మాటలతో తిడుతున్న మెసేజ్ లతో మానసికంగా హింసిస్తున్నట్లు శృతి హాసన్ ఫిర్యాదు చేసినట్లు తెలుస్తోంది. కొన్ని మెసేజ్ లలో తనను చంపుతానని బెదిరిస్తున్నట్లు కూడా శృతి వివరించిందట శృతి హాసన్.

Like Us on Facebook : https://www.facebook.com/Tupakidotcom/