ట్రైల‌ర్ టాక్‌: నీలోని శ‌క్తితోనే సూప‌ర్ హీరో కాగ‌ల‌వు

సైలెంటు గా హిట్లు కొట్టి స‌త్తా చాటడం శివ‌కార్తికేయ‌న్ స్టైల్. కోలీవుడ్ లో తెలివైన హీరోగా అత‌డికి గుర్తింపు ఉంది. అంత‌మంది స్టార్ హీరోల్లో శివ కార్తికేయ‌న్ త‌న‌ని తాను నిల‌బెట్టుకుంటున్న తీరుకు ప్ర‌త్యేకించి ఫ్యాన్స్ న్నారు. శివ కార్తికేయన్- కల్యాణి ప్రియదర్శన్ జంటగా పీఎస్ మిత్రన్ దర్శకత్వం లో తెరకెక్కిన యాక్షన్ థ్రిల్లర్ `హీరో` తెలుగులో `శక్తి` (ది సూప‌ర్ హీరో) పేరుతో అనువాద‌మై విడుదలవుతోంది. ఇందులో యాక్షన్ కింగ్ అర్జున్.. బాలీవుడ్ నటుడు అభయ్ డియోల్.. ఇవానా కీల‌క పాత్రల్లో నటించారు. కేజేఆర్ స్టూడియోస్ సంస్థ ఈ చిత్రాన్ని నిర్మించింది.

తాజాగా శక్తి థియేట్రికల్ ట్రైలర్ రిలీజ్ అయింది. విజువ‌ల్స్ ఆద్యంతం ఎంతో స్ఫూర్తివంత‌మైన థీమ్ తో ఆక‌ట్టుకుంది. సూపర్ హీరో కావాలని కలలు కనే శక్తిగా శివ కార్తికేయన్ ఈ చిత్రంలో క‌నిపించ‌నున్నాడు. ప్ర‌త్యేకించి సూప‌ర్ హీరో మాస్క్ తో శివ కార్తికేయ‌న్ పాత్ర చిత్ర‌ణ ఆస‌క్తిని రేకెత్తించింది. అర్జున్.. అభయ్ డియోల్ నెగెటివ్ షేడ్ ఉన్న పాత్రల్లో నటించారు. విద్యతో వ్యాపారం- నకిలీ సర్టిఫికెట్ల దందాపై సినిమా ఇద‌ని ఇప్ప‌టికే ప్ర‌చారం ఉంది.

ఇక అభిమ‌న్యుడు (ఇరుంబు తిరై - విశాల్) లాంటి బ్లాక్ బస్ట‌ర్ ని తెర‌కెక్కించిన పి.ఎస్.మిత్ర‌న్ మైండ్ గేమ్ నేప‌థ్యంలో మ‌రో ఆస‌క్తిక‌ర చిత్రాన్ని తెర‌కెక్కించార‌ని అర్థమవుతోంది. ట్రైల‌ర్ ఆద్యంతం బీజీఎం తో పాటు.. రీరికార్డింగ్ మెప్పించింది. మార్చి 20న శ‌క్తి ప్రేక్షకుల ముందుకు రానుంది. ఈ చిత్రానికి సంగీతం : యువన్ శంకర్ రాజా- కెమెరా : జార్జ్ సి. విలియమ్స్.