అర్జున్ డాట‌ర్ కు సీనియ‌ర్ల ఆశీస్సులు!

తెలుగులో హీరోగా మంచి పేరు తెచ్చుకున్న యాక్ష‌న్ కింగ్ అర్జున్ ప్ర‌స్తుతం కీల‌క పాత్ర‌ల్లో న‌టిస్తూ ఆక‌ట్టుకుంటున్నారు. క్రేజీ హీరోల చిత్రాల్లో ప్ర‌ధాన్య‌త వున్న క్యారెక్ట‌ర్ల‌లో న‌టిస్తూ త‌న‌దైన మార్కు న‌టన‌తో అద‌ర‌గొడుతున్నారు. రీసెంట్ గా మాస్ మ‌హారాజా ర‌వితేజ న‌టించిన 'ఖిలాడీ'లో న‌టించిన అర్జున్ ప్ర‌స్తుతం ప‌లు చిత్రాల్లో న‌టిస్తూనే త‌న ముద్దుల కూతురు ఐశ్వ‌ర్య అర్జున్ ని తెలుగులో హీరోయిన్ గా ప‌రిచ‌యం చేస్తున్నారు. ఈ మూవీకి తానే స్వ‌యంగా ద‌ర్శ‌కత్వం వ‌హిస్తున్నారు.

మాస్ కా దాస్ విశ్వ‌క్ సేన్ హీరోగా న‌టిస్తున్న ఈ మూవీని లాంఛ‌నంగా ప‌వ‌ర్ స్టార్ ప‌వ‌న్ క‌ల్యాన్ క్లాప్ తో ఇటీవ‌ల ప్రారంభించారు. రెగ్యుల‌ర్ షూటింగ్ త్వ‌ర‌లో ప్రారంభం కానుంది. ఇప్ప‌టికే ఐశ్వ‌ర్య‌ని త‌మిళంలో విశాల్ హీరోగా రూపొందిన సినిమాతో పరిచ‌యం చేశారు. అది పెద్ద‌గా ఆడ‌లేదు. ఆ త‌రువాత క‌న్న‌డ‌లో 'ప్రేమ బ‌ర్హ‌' పేరుతో చేసిన మూవీ ఫ‌ర‌వాలేద‌నించింది. ఇప్ప‌డు తెలుగులో విశ్వ‌క్ సేన్ హీరోగా చేస్తున్న సినిమా ద్వారా ఐశ్వ‌ర్య అర్జున్ ని పరిచ‌యం చేస్తున్నారు.

తమిళ‌, క‌న్న‌డ భాష‌ల్లో ఐశ్వ‌ర్య హీరోయిన్ గా స‌క్సెస్ కాలేక‌పోయింది. త‌న‌కు అచ్చివ‌చ్చిన తెలుగులో అయినా త‌ను హీరోయిన్ గా నిల‌బ‌డాల‌ని అర్జున్ విశ్వ‌ప్ర‌య‌త్నాలు చేస్తున్నారు. క్రేజీ హీరో విశ్వ‌క్ ని అందుకే ఈ ప్రాజెక్ట్ కి హీరోగా ఎంచుకున్నార‌ట‌. ఈ నేప‌థ్యంలోనే తెలుగు లెజెండ‌రీల ఆశీర్వాదాలు తీసుకుంటున్నారు. సూప‌ర్ స్టార్ కృష్ణ ని ప్ర‌త్యేకంగా క‌లిసిన అర్జున్ త‌న కూతురుకి ఆశీర్వ‌చ‌నాలు కోరారు. ఆ త‌రువాత క‌ళాత‌ప‌స్వీ కె. విశ్వ‌నాథ్ ని క‌లిసిన అర్జున్ ఆయ‌న ఆశీస్సుల‌ని కూడా ఐశ్వ‌ర్య తీసుకున్నారు.

ఇందుకు సంబంధించిన ఫొటోలు ప్ర‌స్తుతం నెట్టింట వైర‌ల్ అవుతున్నాయి. అర్జున్ క‌న్న‌డ హీరో అయినా ఆయ‌న‌కు న‌టుడిగా గుర్తింపుని తెచ్చింది మాత్రం తెలుగు సినిమాలే. కోడి రామ‌కృష్ణ తెర‌కెక్కించిన 'మ‌న్నెంలో మొన‌గాడు' సినిమాతో అర్జున్ హీరోగా మంచి గుర్తింపుని సొంతం చేసుకున్నారు. ఆ సెంటిమెంట్ త‌న కూతురు ఐశ్వ‌ర్య కెరీర్ విష‌యంలోనూ రిపీట్ అవుతుంద‌ని గ‌ట్టి న‌మ్మ‌కంతో వున్నారు అర్జున్‌.