కమ్ముల మళ్లీ పెద్ద ప్రయత్నం

విభిన్న చిత్రాల దర్శకుడిగా పేరు దక్కించుకున్న శేఖర్‌ కమ్ముల ఫిదా సినిమాతో కమర్షియల్‌ డైరెక్టర్ గా కూడా మంచి పేరు పొందాడు. ఫిదా చిత్రం కథను మహేష్ బాబుతో పాటు పలువురు స్టార్‌ హీరోల వద్దకు తీసుకు వెళ్లినట్లుగా శేఖర్‌ కమ్ముల చెప్పుకొచ్చాడు. ఫిదా కథపై వారు నమ్మకం వ్యక్తం చేయలేదు. దాంతో శేఖర్‌ కమ్ముల ఫిదా తర్వాత మళ్లీ మీడియం రేంజ్ హీరోతోనే సినిమాను చేశాడు. అక్కినేని హీరో నాగచైతన్య తో శేఖర్‌ కమ్ముల తెరకెక్కించిన లవ్‌ స్టోరీ విడుదలకు సిద్దంగా ఉంది. కరోనా సెకండ్‌ వేవ్‌ వచ్చి ఉండకుంటే ఇప్పటి వరకు సినిమా ప్రేక్షకుల ముందుకు వచ్చేది. కాని కరోనా వల్ల మళ్లీ ఆగిపోయింది.

లవ్‌ స్టోరీ సినిమాను ప్రేక్షకుల ముందుకు తీసుకు వచ్చే ప్రయత్నాలతో పాటు మరో వైపు శేఖర్‌ కమ్ముల స్టార్‌ హీరోతో సినిమా కోసం కథను రాస్తున్నాడట. ఇటీవల ఒక ఇంటర్వ్యూలో శేఖర్‌ కమ్ముల మాట్లాడుతూ తాను ఈసారి స్టార్‌ హీరోతో సినిమాను చేసేందుకు గాను స్క్రిప్ట్‌ రెడీ చేస్తున్నట్లుగా చెప్పుకొచ్చాడు. గతంలో వెంకటేష్‌ తో శేఖర్‌ కమ్ముల సినిమాను చేసేందుకు ప్రయత్నం చేశాడని వార్తలు వచ్చాయి. కాని ఆ ప్రాజెక్ట్‌ పట్టాలెక్కలేదు. మహేష్ బాబు వంటి స్టార్ తో కూడా శేఖర్‌ కమ్ముల సినిమాను ప్రయత్నించాడు. కాని ఆయన కూడా ఓకే చెప్పలేదు.

ఇప్పుడు మరోసారి స్టార్‌ హీరోతో సినిమా కోసం శేఖర్‌ కమ్ముల ప్రయత్నాలు చేస్తున్నట్లుగా తెలుస్తోంది. ఈసారి పక్కా కమర్షియల్‌ మాస్ సినిమాను ఈయన ఒక స్టార్‌ హీరోతో చేస్తానంటూ చెబుతున్నాడు. మరి ఏ హీరో ఈయనతో సినిమాను చేసేందుకు సిద్దం అవుతాడు అనేది చూడాలి. శేఖర్‌ కమ్ముల దర్శకత్వంలో రూపొందిన లవ్ స్టోరీ సినిమా సక్సెస్‌ అయితే ఖచ్చితంగా స్టార్‌ హీరోతో అవకాశం దక్కించుకునే అవకాశం ఉందంటున్నారు.