'సవ్యసాచి' హంగామాకు రంగం సిద్ధం

ఇటీవలే ‘శైలజా రెడ్డి అల్లుడు’గా పలకరించిన అక్కినేని నాగచైతన్య.. దీని తర్వాత ‘సవ్యసాచి’గా రాబోతున్నాడు. చైతూ కెరీర్‌ ను మలుపు తిప్పే.. మరో స్థాయికి తీసుకెళ్లే సినిమాగా దీనిపై అంచనాలున్నాయి. కొన్ని నెలల కిందటే విడుదల కావాల్సిన ఈ చిత్రం విజువల్ ఎఫెక్ట్స్ పనుల్లో జాప్యం వల్ల ఆలస్యమైంది. ఐతే ఎట్టకేలకు సినిమా విడుదలకు సిద్ధమవుతున్నట్లు సమాచారం. చిత్ర బృందం టీజర్ విడుదలకు కూడా ముహూర్తం చూసుకుంది. అక్టోబరు 1న.. అంటే ఇంకో రెండు రోజుల్లోనే టీజర్ రాబోతోంది. సోమవారం ఉదయం 10 గంటలకు టీజర్ లాంచ్ అవుతుందని ప్రకటించారు.

టీజర్ యాక్షన్ ప్యాక్డ్ గా ఉంటుందని.. చైతూను సరికొత్త అవతారంలో చూస్తామని.. చందూ మొండేటి టాలెంట్ ఏంటో కూడా ఈ టీజర్ రుజువు చేస్తుందని అంటున్నారు. ఈ చిత్రం ఒక వైవిధ్యమైన కాన్సెప్ట్ తో తయారవుతోంది. చైతూ ఒక చేయి తన అధీనంలో ఉండని కుర్రాడి పాత్రలో కనిపించనున్నాడు. ఇది చాలా ఎగ్జైట్ చేసే అంశమే. ఈ చిత్రంలో బాలీవుడ్ భామ నిధి అగర్వాల్ కథానాయికగా నటిస్తున్న ఈ చిత్రంలో తమిళ స్టార్ హీరో మాధవన్ విలన్ పాత్రలో కనిపించనుండటం విశేషం. ఈ వేసవిలో ‘రంగస్థలం’తో భారీ విజయాన్నందుకున్న మైత్రీ మూవీ మేకర్స్ ఈ చిత్రాన్ని నిర్మిస్తోంది. ఈ చిత్రం నవంబరులో విడుదలయ్యే అవకాశాలున్నాయి. యాక్షన్ సినిమాతో పెద్ద హిట్టు కొట్టాలన్న చైతూ కలను ఈ సినిమా నెరవేరుస్తుందని భావిస్తున్నారు. ఇంతకీ దీని టీజర్ ఎలా ఉంటుందో చూడాలి.