రాజ‌కీయాల‌పై రెహ‌మాన్ క‌ల్లోలం

రెహ‌మాన్ అంటే క‌మ‌ర్షియ‌ల్ గీతాల‌కు కేరాఫ్ అడ్ర‌స్‌. ఆయ‌న నుంచి ఓ ఆల్బ‌మ్ వ‌స్తోందంటే ఎన్ని వెస్ట్ర‌న్ ట్యూన్స్ వ‌స్తాయా? అని అంతా ఆస‌క్తిగా ఎదురు చూస్తుంటారు. అలాంటి రెహ‌మాన్ నుంచి ఎవ‌రూ ఊహించ‌ని రీతిలో ఓ విప్ల‌వ గీతం వ‌చ్చింది. ఈ అసాధ్యాన్ని సుసాధ్యం చేసింది మ‌రెవ‌రో కాదు విభిన్న చిత్రాల ద‌ర్శ‌కుడు ఏ.ఆర్‌. మురుగ‌దాస్‌. విజ‌య్ హీరోగా త‌మిళంలో ఎ.ఆర్‌. మురుగ‌దాస్ `స‌ర్కార్‌` పేరుతో ఓ చిత్రాన్ని రూపొందిస్తున్నాడు. స‌మ‌కాలీన రాజ‌కీయాల‌పై వ్యంగ్రాస్త్రంగా తెర‌కెక్కుతున్న ఈ సినిమా ఫ‌స్ట్ లుక్ నుంచి వివాదాస్ప‌ద‌మ‌వుతున్న విష‌యం తెలిసిందే.

ఈ చిత్రానికి ఆస్కార్ విన్న‌ర్ ఎ.ఆర్‌.రెహ‌మాన్ సంగీతం అందించారు. ఇటీవ‌లే ఈ చిత్రానికి సంబంధించిన `సిమ్టాంగ‌ర‌న్‌..` అనే ప‌ల్ల‌వితో సాగే పాట‌ను విడుద‌ల చేశారు. ఈ పాట‌లోని ప‌దాలు అర్థం కాలేద‌ని సోష‌ల్ మీడియాలో పెను దుమార‌మే చెల‌రేగింది. తాజాగా ఈ చిత్రానికి `ఒరు విర‌ల్ పుర‌ట్చి..` అనే విప్ల‌వ గీతాన్ని విడుద‌ల చేశారు. ఈ పాట‌ను ఎ.ఆర్‌.రెహ‌మాన్ పాడ‌టం స‌ర్వ‌త్రా ఆస‌క్తిని రేకెత్తిస్తోంది. ఈ పాట ప్ర‌స్తుతం యూట్యూబ్‌ లో హ‌ల్ చ‌ల్ చేస్తోంది.