అతడి ట్యాలెంట్‌ ను జక్కన్న ఫుల్‌ గా వాడేస్తున్నాడట

తమిళ ట్యాలెంటెడ్‌ డైరెక్టర్‌.. యాక్టర్‌ అయిన సముద్ర ఖని తెలుగులో ఇప్పటికే పలు చిత్రాల్లో నటించి మెప్పించాడు. ఆర్‌ఆర్‌ఆర్‌ చిత్రంలో ఒక కీలకమైన పాత్రకు గాను ఆయన్ను జక్కన్న ఎంపిక చేశాడు. తమిళంలో సినిమాకు క్రేజ్‌ ఏర్పడటంతో పాటు ఆ పాత్రకు సముద్ర ఖని వంటి విలక్షన నటుడు అయితే బాగా చేస్తాడని జక్కన్న భావించాడని టాక్‌. విభిన్నమైన బాడీ లాంగ్వేజ్‌ తో పాటు నటనలో విలక్షణం చూపించే సముద్ర ఖని ఆర్‌ఆర్‌ఆర్‌ లో ఏ పాత్రను చేస్తున్నాడు అనేది ప్రస్తుతం అందరిని తొలుస్తున్న ప్రశ్న.

ఇద్దరు హీరోలకు స్వాతంత్య్ర ఉద్యమ పాఠాలను నేర్పించే గురువుగా బాలీవుడ్‌ స్టార్‌ అజయ్‌ దేవగన్‌ కనిపించబోతున్నాడు. మరి ఈ ట్యాలెంటెడ్‌ నటుడు ఏ పాత్రలో కనిపిస్తాడు అనేది ఆసక్తికరంగా మారింది. రాజమౌళి తన సినిమాలోని ప్రతి పాత్రకు చాలా ప్రాముఖ్యతను కల్పిస్తాడు. చిన్న పాత్ర అయినా అది కథలో భాగం అయ్యి ఉంటుంది. అందుకే సముద్ర ఖని కూడా తప్పకుండా సినిమాలో ఒక మంచి పాత్రలో కనిపించే అవకాశం ఉందని విశ్లేషకులు అభిప్రాయం వ్యక్తం చేస్తున్నారు.

ఇదే సమయంలో రాజమౌళి ఈ చిత్రం కోసం సముద్ర ఖని నుండి నటనను పిండేసుకున్నట్లుగా యూనిట్‌ సభ్యులు ఆఫ్‌ ది రికార్డు చెబుతున్నారు. ఇప్పటి వరకు ఎన్నో చిత్రాల్లో సముద్ర ఖని అద్బుతమైన నటనతో పాత్రకు ప్రాణం పోశాడు. ఈసారి ఆర్‌ఆర్‌ఆర్‌ చిత్రంలో అంతకు మించిన నటన ప్రతిభను ప్రేక్షకులకు జక్కన్న చూపించబోతున్నాడట. అదే కనుక నిజం అయితే సముద్ర ఖని తెలుగు మరియు తమిళంలోనే కాకుండా బాలీవుడ్‌ లో కూడా బిజీ అయ్యే అవకాశం ఉందనిపిస్తుంది.