'సలార్' ఆడిషన్స్ బిగిన్: ప్రభాస్ తో నటించే ఛాన్స్ ఎవరికి దక్కుతుందో..!

యంగ్ రెబల్ స్టార్ ప్రభాస్‌ - దర్శకుడు ప్రశాంత్‌ నీల్‌ కాంబినేషన్ లో 'సలార్‌' అనే సినిమా రూపొందున్న విషయం తెలిసిందే. పాన్ ఇండియా మూవీగా తెరకెక్కనున్న ఈ చిత్రాన్ని హోంబలే ఫిలింస్‌ బ్యానర్‌ పై విజయ్‌ కిరంగందూర్‌ నిర్మిస్తున్నాడు. భారీ క్యాస్టింగ్ తో తెరకెక్కనున్న ఈ చిత్రంలో కొత్త వారికి కూడా అవకాశం కల్పించాలని మేకర్స్ నిర్ణయించుకున్నారు. ఈ నేపథ్యంలో డిసెంబర్ 15న హైద్రాబాద్ లో ఆడిషన్స్ నిర్వహించనున్నట్లు దర్శకనిర్మాతలు ఇటీవల ప్రకటించారు. నటనపై ఆసక్తి ఉన్నవారు ఏదైనా భాషలో ఓ నిమిషం పాటు నటించిన వీడియోని తీసుకురావాలని.. దీనికి ఏజ్ లిమిట్ ఏమీ లేదని పేర్కొన్నారు. అయితే ఈరోజు 'సలార్' సినిమా కోసం ఆడిషన్స్ జరిగినట్లు తెలుస్తోంది.

హైదరాబాద్‌ శేరిలింగంపల్లిలోని అల్యూమినియం ఫ్యాక్టరీలో ఈరోజు ఉదయం 9 గంటల నుంచి సాయంత్రం 6 గంటల వరకు జరిపారని తెలుస్తోంది. ఇలాంటి ఆడిషన్స్‌ త్వరలో బెంగళూరు, చెన్నై నగరాలలో కూడా నిర్వహించనున్నారు. మరి యంగ్ రెబల్ స్టార్ సినిమాలో నటించే అరుదైన అవకాశాన్ని ఎంతమంది దక్కించుకుంటారో చూడాలి. కాగా, 'సలార్' చిత్రాన్ని వచ్చే జనవరిలో స్టార్ట్‌ చేయనున్నారు. ఈ హై వోల్టేజ్ యాక్షన్ ఎంటర్టైనర్ స్క్రిప్ట్ కూడా రెడీగా ఉండటంతో 2021లోనే సినిమాను విడుదల చేసేలా మేకర్స్ సన్నాహాలు చేస్తున్నారని సమాచారం. ఇప్పటికే 'రాధే శ్యామ్' షూటింగ్ కంప్లీట్ చేసే పనిలో ఉన్న ప్రభాస్.. 'సలార్' తోపాటు 'ఆది పురుష్' సినిమాని కూడా చేయనున్నాడు.