కెమెరా ముందుకు రియా చక్రవర్తి.. త్వరలో సెట్స్ పైకి?

సుశాంత్ సింగ్ మరణం నేపథ్యంలో తెరపైకి వచ్చిన డ్రగ్స్ కేసులో.. బాలీవుడ్ నటి రియా చక్రవర్తిని పోలీసులు అరెస్టు చేసిన విషయం తెలిసిందే. నెల రోజుల పాటు ఆమెను జైల్లో ఉంచారు. అయితే.. ఆ తరువాత కొన్ని ‘పెద్ద తలకాయలు’ ప్రవేశించిన తర్వాత ఆమె బెయిల్‌పై విడుదలయ్యారు.

ఇదే కేసులో ఆమె సోదరుడు కూడా అరెస్టు అయిన విషయం తెలిసిందే. అతనికి మాత్రం మూడు నెలల తరువాత బెయిల్ దొరికింది. ప్రస్తుతం సుశాంత్ సింగ్ మరణంపై సీబీఐ దర్యాప్తు చేస్తోంది. త్వరలో ఈ కేసుపై సీబీఐ ఛార్జ్ షీట్ దాఖలు చేయనున్నట్టు తెలుస్తోంది.

ఈ వ్యవహారంతో రియా చాలా అప్ సెట్ అయ్యిందని టాక్. మాదకద్రవ్యాల వినియోగం కేసులో అభియోగం.. నెల రోజులు జైల్లో ఉండడం.. వంటి పరిస్థితులు ఎదుర్కోవడంతో తీవ్ర వేదనకు గురైంది.

కాగా.. రియా ఇప్పుడిప్పుడే సాధారణ స్థితికి చేరుకుంటోందని తెలుస్తోంది. ముంబైలోని ఆమె డైరెక్టర్ మిత్రుల్లో ఒకరు ఈ విషయాన్ని తెలిపారు. రియా మెల్లగా మామూలు మనిషి అవుతోందని, వచ్చే ఫిబ్రవరిలో తిరిగి షూటింగ్ లో పాల్గొంటారని తెలిపారు. కాగా.. రియా ఇప్పటికే హిందీలో ఒక చిన్న బడ్జెట్ చిత్రానికి సంతకం చేసింది. ఈ మూవీ చిత్రీకరణలో పాల్గొనడంతోపాటు రియాలిటీ షోలో కూడా భాగం అవుతుందని సమాచారం.