నాన్నతో చరణ్‌ గెస్ట్‌ కు ఎక్కువ హీరోకు తక్కువ

మెగాస్టార్‌ చిరంజీవి 152వ చిత్రం శరవేగంగా చిత్రీకరణ జరుపుకుంటుంది. ప్రస్తుతం రామ్‌ చరణ్‌ రంగస్థలం చిత్రం షూటింగ్‌ జరుపుకున్న రంగస్థలం గ్రామం సెట్‌ లోనే చిన్న చిన్న మార్పులు చేర్పులు చేసి చేస్తున్నారట. అక్కడే దాదాపుగా రెండు నెలల పాటు చిత్రీకరణ చేయబోతున్నట్లుగా పుకార్లు షికార్లు చేస్తున్నాయి. ఇదే సమయంలో ఈ చిత్రంలో రామ్‌ చరణ్‌ కూడా ఒక కీలక పాత్రలో కనిపించబోతున్నట్లుగా ప్రచారం జరుగుతోంది. చిరు మూవీలో చరణ్‌ అంటూ చాలా రోజులుగా వార్తలు వస్తున్నాయి. కాని ఇప్పుడు ఈ పుకార్లలో ఇంకో అడుగు ముందుకు పడింది.

ఇన్ని రోజులు చిరంజీవి యంగ్‌ ఏజ్‌ పాత్రలో చరణ్‌ కనిపిస్తాడని.. ఇద్దరి కాంబోలో సీన్స్‌ ఉండవంటూ వార్తలు వచ్చాయి. కాని ఇప్పుడు మాత్రం ఇద్దరి కాంబోలో సీన్స్‌ ఉంటాయి. చిరంజీవి ఆచార్యగా కనిపిస్తే చరణ్‌ సిద్దు అనే పాత్రలో కనిపించబోతున్నాడు. వీరిద్దరి కాంబో సీన్స్‌ ను చాలా రహస్యంగా చివర్లో షూట్‌ చేసే ఉద్దేశ్యంలో దర్శకుడు ఉన్నాడు అంటూ ఇండస్ట్రీ వర్గాల నుండి టాక్‌ వినిపిస్తుంది.

మెగా 152 చిత్రంలో చరణ్‌ ది కేవలం 15 నుండి 20 నిమిషాలు మాత్రమే ఉండే పాత్ర. అంటే చరణ్‌ చేయబోతున్నది గెస్ట్‌ రోల్‌ కు ఎక్కువ హీరో రోల్‌ కు తక్కువ. అయినా కూడా మెగా ఫ్యాన్స్‌ కు చిరు.. చరణ్‌ లను ఒకేసారి వెండి తెర పై చూస్తే పండుగే. ఆ పండుగ కోసం ఎంతో ఆసక్తిగా ఎదురు చూస్తున్నారు. అపజయం ఎరుగని కొరటాల శివ ఈ చిత్రంతో మరో బ్లాక్‌ బస్టర్‌ ను చిరంజీవి ఖాతాలో వేయడం ఖాయం అంటూ మెగా ఫ్యాన్స్‌ చాలా నమ్మకంగా ఉన్నారు. ఆగస్టులో లేదంటే దసరాకు ఈ చిత్రాన్ని విడుదల చేసే అవకాశం ఉంది.