చరణ్ బర్త్ డే స్పెషల్ పోస్టర్: 'ఆచార్య' తో కలిసి నడుస్తున్న 'సిద్ధ'..!

మెగాస్టార్ చిరంజీవి - మెగా పవర్ స్టార్ రామ్ చరణ్ కలిసి నటిస్తున్న సినిమా ''ఆచార్య''. దర్శకుడు కొరటాల శివ ఈ చిత్రాన్ని తెరకెక్కిస్తున్నారు. సురేఖ కొణిదెల సమర్పణలో మ్యాట్నీ ఎంటర్‌టైన్‌మెంట్‌ మరియు కొణిదెల ప్రొడక్షన్‌ కంపెనీ బ్యానర్స్ పై నిరంజన్ రెడ్డి నిర్మిస్తున్నారు. ఇందులో చరణ్ కామ్రేడ్ 'సిద్ధ' అనే పాత్రలో కనిపించనున్న సంగతి తెలిసిందే. అయితే నేడు రామ్ చరణ్ పుట్టినరోజు సందర్భంగా 'ఆచార్య' టీమ్ ఆయనకు శుభాకాంక్షలు తెలియజేస్తూ ఓ కొత్త పోస్టర్ ని విడుదల చేశారు.

ఇందులో చిరంజీవి - చరణ్ ఇద్దరూ నక్సలైట్ గెటప్ లో చేతిలో తుపాకులు పట్టుకొని నడుస్తున్నారు. ఆచార్య పక్కన సిద్ధ నడుస్తున్న ఈ పోస్టర్ మెగా అభిమానులను విశేషంగా ఆకట్టుకుంటోంది. తండ్రీకొడుకులు కలిసి నటిస్తున్న 'ఆచార్య' సినిమాపై భారీ అంచనాలే ఉన్నాయి. ఇందులో చిరంజీవి కి జోడీగా కాజల్ అగర్వాల్ నటిస్తుండగా.. చరణ్ సరసన పూజా హెగ్డే హీరోయిన్ గా కనిపించనుంది. సోనూ సూద్ - జిషు సేన్ గుప్తా కీలక పాత్రలు పోషిస్తున్నారు.

కొరటాల తనదైన శైలిలో కమర్షియల్ అంశాలతో కూడిన సందేశాత్మక చిత్రంగా 'ఆచార్య'ను రెడీ చేస్తున్నారు. మణిశర్మ ఈ చిత్రానికి సంగీతం సమకూరుస్తుండగా.. తిరు సినిమాటోగ్రాఫర్ గా వ్యవహరిస్తున్నారు. నవీన్ నూలి ఎడిటింగ్ వర్క్ చేస్తున్నారు. సమ్మర్ కానుకగా మే 13న 'ఆచార్య' ప్రపంచ వ్యాప్తంగా విడుదల కానుంది.