రకుల్ సమర్పించు..సాయిధరమ్ ఫస్ట్ లుక్

తొలి సినిమా ‘రేయ్’ విడుదల విషయంలో చాలా ఇబ్బందులెదుర్కన్నప్పటికీ.. రెండో సినిమా ‘పిల్లా నువ్వు లేని జీవితం’ దగ్గర్నుంచి యమ స్పీడుగా దూసుకెళ్లిపోతున్నాడు సాయిధరమ్ తేజ్. అతడి సినిమాలు గత ఏడాది రెండు.. ఈ ఏడాది రెండు రిలీజయ్యాయి. వచ్చే ఏడాది కూడా రెండు రిలీజుండేలా ప్లాన్ చేసుకుంటున్న తేజు.. ముందుగా గోపీచంద్ మలినేని దర్శకత్వంలో తన కొత్త సినిమాను మొదలుపెట్టేశాడు. ఈ రోజే ఆ చిత్రం ప్రారంభోత్సవం జరుపుకుంది. దీంతో పాటే రెగ్యులర్ షూటింగ్ కూడా మొదలుపెట్టేశారు. ఈ చిత్రంలో రకుల్ ప్రీత్ సింగ్ కథానాయికగా నటిస్తోంది.

ఈ రోజు షూటింగ్ సందర్భంగా రకుల్.. తేజుతో కలిసి ఓ తమాషా చేసింది. అతడి ఫస్ట్ లుక్‌ ను వెరైటీగా పరిచయం చేసింది. ఈ సినిమా కోసం తేజు హేర్ స్టైల్ మార్చడంతో పాటు మీసం కూడా బాగా ట్రిమ్ చేశాడు. అతను ఎక్కడైతే లుక్ మార్చుకున్నాడో వాటిని చేతుల్తో మూసేస్తూ ఫొటో తీసి ట్విట్టర్లో పెట్టింది రకుల్. తేజు పర్సనల్ స్టైలిస్ట్ అయిన నీరజ కోననే అతడికీ కొత్త లుక్ తీసుకొచ్చింది. స్పోర్ట్స్ బ్యాక్ డ్రాప్ లో తెరకెక్కబోతున్న ఈ సినిమా కోసం అవతారం మార్చేశాడు తేజు. ఇది నిజానికి వరుణ్ తేజ్ హీరోగా చేయాల్సిన సినిమా. అనుకోకుండా సాయిధరమ్ తేజ్‌ చేతికి వచ్చింది. ‘పండగ చేస్కో’తో డిజప్పాయింట్ చేసిన గోపీచంద్.. ఈ సినిమాతో మళ్లీ తనేంటో ప్రూవ్ చేసుకోవాలనుకుంటున్నాడు. నల్లమలుపు శ్రీనివాస్-ఠాగూర్ మధు ఈ చిత్రాన్ని నిర్మిస్తారు.