కబాలి కొత్త పోస్టర్‌: వామ్మో పీక్స్

ఇప్పటివరకు కేవలం మనం స్టయిలిష్‌ గా ఉన్న రజనీకాంత్ ను ఉత్తుత్తి పోస్టర్లలోనే చూశాం. అయితే ఇప్పుడు డేట్ తో కూడిన అసలు సిసలైన 'కబాలి' పోస్టర్ రంగంలోకి దిగింది. ఈసారి అసలు కబాలి సినిమాలో ఉన్న ఎమోషనల్‌ కోషెంట్ ఏంటో చూపించే ప్రయత్నం చేశాడు దర్శకుడు పా.రంజిత్.

కాస్త నెరిసిన జుట్టుతో ఇప్పుడు స్టయిల్ గా రజనీ నడిచొస్తుంటే.. ఈ కొత్త పోస్టర్ లో మాత్రం మనోడు అదే గెటప్ లో విలన్లను చితక్కొట్టేసి.. తను కూడా కాస్త గాయాలపాలై.. సూటిగా కెమెరాలోకి చూస్తే ఆ ఇంటన్సెటీ పీక్స్ లో ఉంది చూస్కోండి. అలాగే ఆంజనేయుడు తన గుండెలను చీల్చి శ్రీరాముల వారిని చూపించినట్లు.. ఇప్పుడు రజనీకాంత్ షర్టు గుండీలు ఊడిపోయి ఎగురుతుంటే.. అక్కడ బాధతో కళ్ళ చెమర్చిన రాధికా ఆప్టే కనిపిస్తోంది. బ్లాక్ అండ్ వైట్ కు దగ్గర్లో ఉన్న ఈ పోస్టర్ ఇప్పుడు అభిమానులకు బాగా నచ్చేసింది.

తొలిసారిగా జూలై 22న రిలీజ్ అంటూ ఈ కబాలి పోస్టర్ చెబుతోంది. త్వరలోనే రజనీకాంత్ ఇండియా వచ్చి.. సినిమా రిలీజ్ కంటే ముందే తన అభిమానులతో మాట్లాడతారట. అది సంగతి.