కట్టప్ప పైనే జక్కన్న ఆలోచనంతా

ప్రస్తుతం మనకి జవాబు తెలియని ప్రశ్నలు రెండే రెండు .. ఒకటి మెలోడీ ఎందుకు ఇంత చాక్లెటీగా వుంటుంది అని, రెండు బాహుబలిని కట్టప్ప ఎందుకు చంపాడు అని.. మొదటిదానికి సమాధానం మనకి మనమే తెలుసుకోవాలి గానీ రెండవ దానికి మాత్రం వచ్చే యేడు జక్కన్న జవాబు కోసం ఎదురు చూడాల్సిందే..

నిజానికి మొదటిభాగాన్ని ఫ్లాట్ నోట్ లో కాకుండా ప్రేక్షకుడు కాస్త థ్రిల్ కి గురయ్యేలా ట్విస్ట్ తో ముగించాలనుకున్నాడు రాజమౌళి. అయితే ఆ ట్విస్ట్ ఈ రేంజ్ లో చర్చనీయాంశంగా మారుతుందని ఊహించలేదు. ఇప్పుడు బాహుబలిలో కట్టప్ప ఎపిసోడ్ హాట్ టాపిక్ గా మారింది కాబట్టి రెండవ భాగంలో ఆ ఎపిసోడ్ ని ఏకాస్త ఏమరపాటుగా తెరకెక్కించినా మొదటికే మోసం వస్తుందని జక్కన్న గ్రహించాడు. అనుకున్న స్టోరీకి ఇంకేమన్నా మార్పులు చెయ్యగలమా అన్న కోణంలో కూడా ఆలోచిస్తున్నట్టు సమాచారం. ఈలోపు ప్రేక్షకుల అంచనాలను తగ్గించడానికి జక్కన్న, వాళ్ళ నాన్న కట్టప్ప కేవలం బాహుబలిని పోడిచాడంటే.. చంపాడా లేదా అన్నది మీరే చూడాలి అని మరో హింట్ ఇచ్చిన విషయం తెలిసినదే.