బాలయ్య ఎనర్జీనే వేరంటున్న పూరి

తనను స్పీడ్ డైరెక్టర్ అని ఎందుకంటారో పూరి జగన్నాథ్ మరోసారి చూపించాడు. నందమూరి బాలకృష్ణకు అతను ఎప్పుడు కథ చెప్పాడో తెలియదు. ఉన్నట్లుండి వీళ్లిద్దరి కాంబినేషన్లో సినిమా అనౌన్స్ అయింది. ఐతే ఈ చిత్రానికి కాస్టింగ్ కాల్ అదీ ఇదీ అన్నాడు పూరి. కానీ ఆ ప్రక్రియ మొదలైందో లేదో కూడా తెలియదు. అంతలోనే సినిమా ప్రారంభోత్సవం జరుపుకుంది. షూటింగ్ విషయంలోనూ ఆలస్యమేమీ లేదు. చడీచప్పుడు లేకుండా రెగ్యులర్ షూట్ కు వెళ్లిపోయాడు పూరి. ఈ గురువారమే బాలయ్య-పూరి సినిమా సెట్స్ మీదికి వెళ్లిపోవడం విశేషం. తొలి రోజు షూటింగ్ తర్వాత పూరి ట్విట్టర్లో మెసేజ్ కూడా పెట్టాడు.

బాలయ్య సినిమా తొలి రోజు షూట్ అద్భుతంగా జరిగిందని.. బాలయ్య ఎనర్జీయే వేరని.. ఈ సినిమా కోసం అందరూ ఎదురుచూడమని ట్వీట్ చేశాడు పూరి. అప్పుడే షూటింగ్ మొదలుపెట్టేశారంటే.. అనుకున్న ప్రకారమే సెప్టెంబరు 29న ఈ చిత్రం ప్రేక్షకుల ముందుకు వచ్చేస్తుందన్నమాటే. షూటింగ్ విషయంలో పూరి స్పీడేంటో తెలిసిందే. ఎంత పెద్ద సినిమా అయినా మూడు నాలుగు నెలల్లో అవగొట్టేస్తాడు. మరి ఈ చిత్రంలో బాలయ్యను పూరి ఎలా చూపిస్తాడన్నది ఆసక్తికరం. బాలయ్యకు.. పూరికి మ్యాచ్ అవుతుందని.. వీళ్లిద్దరూ కలిసి ఒక సినిమా చేస్తారని ఎవ్వరూ అనుకోలేదు. హీరోల్ని సరికొత్తగా ప్రెజెంట్ చేయడం.. హీరోయిజం పండించడంలో పూరి స్టయిలే వేరు. మరి బాలయ్యను అతనెలా ప్రెజెంట్ చేస్తాడో చూడాలి.

Like Us on Facebook : https://www.facebook.com/Tupakidotcom/