పూరికిది అగ్ని పరీక్షే..

మధ్యలో ఒక్క ‘టెంపర్’ మినహాయిస్తే పూరి జగన్నాథ్ ను చాలా ఏళ్ల నుంచి ఫ్లాపులు వెంటాడుతున్నాయి. ‘టెంపర్’ కూడా ఆయన సొంత కథ కాదు కాబట్టే ఆడిందన్న అభిప్రాయాలూ ఉన్నాయి జనాల్లో. ఇందుక్కారణం.. ఆ చిత్రానికి ముందు.. వెనుక అట్టర్ ఫ్లాప్ సినిమాలే వచ్చాయి పూరి నుంచి. ‘టెంపర్’ ఊపులో పూరి నుంచి మంచి సినిమాలు వస్తాయని ఆశించిన వారికి జ్యోతిలక్ష్మీ.. లోఫర్.. ఇజం సినిమాలు తీవ్ర నిరాశనే మిగిల్చాయి. ఇప్పుడు పూరి నుంచి ‘రోగ్’ సినిమా వస్తోంది. అసలే పూరి ఫాంలో లేడంటే.. పైగా ఓ కొత్త హీరో తోడయ్యాడు ఆయనకు. దీంతో ‘రోగ్’ ఆశించిన స్థాయిలో ఆసక్తి రేకెత్తించలేకపోయింది.

సినిమా మొదలైనప్పటితో పోలిస్తే.. ఈ మధ్య కొంచెం బజ్ వచ్చింది కానీ.. ‘రోగ్’ మీద పాజిటివ్ ఫీలింగ్ అయితే లేదు జనాలకు. రిలీజ్ కొంచెం హడావుడిగా చేసేస్తుండటం కూడా మైనస్ అవుతోంది. ఒక్క పూరి మినహాయిస్తే ఈ చిత్రంలో ఆకర్షించే అంశాలేమీ కనిపించలేదు ఇప్పటిదాకా. ‘రోగ్’ ప్రోమోలు అవీ చూస్తే.. పూరి గత సినిమాలకేమీ భిన్నంగా అనిపించలేదు. ఇందులోని హీరోయిన్లు కూడా ఏమంత ఆకట్టుకోలేదు. ఎరోటిగ్గా కనిపించిన పాటలు.. ప్రోమోలు కుర్రాళ్లను కొంత మేర ఆశించవచ్చు. అంతకుమించి ‘రోగ్’లో ఆకర్షణలేమీ కనిపించట్లేదు. దీంతో తక్కువ అంచనాల మధ్య ‘రోగ్’ థియేటర్లలోకి దిగుతోంది. ఇలాంటి స్థితిలో పూరి అగ్ని పరీక్షే ఎదుర్కొంటున్నాడు. ‘రోగ్’తో హిట్టు కొట్టడం ఆయనకు సవాలే. పైగా ‘గురు’ లాంటి పాజిటివ్ బజ్ ఉన్న సినిమాతో పోటీ పడుతోందీ చిత్రం. మరి పూరి ఏం చేస్తాడో చూడాలి.

Like Us on Facebook : https://www.facebook.com/Tupakidotcom/