వరుణ్ తేజ్.. ‘చిరుత’ అసిస్టెంట్ డైరెక్టర్!

అంతా అనుకున్నట్లు జరిగి ఉంటే.. చిరుత సినిమా టైటిల్స్ లో అసిస్టెంట్ డైరెక్టర్ల జాబితాలో వరుణ్ తేజ్ పేరు కూడా కనిపించేదేమో. కానీ వరుణ్ స్వయంగా ఆ అవకాశం కోసం అడిగాడట కానీ.. పూరి ఇవ్వలేదట. ఆ తర్వాత వరుణ్ కూడా పట్టించుకోలేదట. ‘లోఫర్’ ఆడియో ఫంక్షన్ సందర్భంగా ఈ ఆసక్తికర విషయం వెల్లడైంది.

చిన్నపుడు చాలా లావుగా ఉన్న వరుణ్ ను చూసినపుడల్లా ఈ కుర్రాడు ఏమవుతాడబ్బా అని ఆశ్చర్యం కలిగేదట పూరి జగన్నాథ్ కి. అందుకే నాగబాబును కలిసినపుడల్లా అసలేం చేయబోతున్నారు మీ అబ్బాయిని అడిగేవాడట. ఐతే ఓసారి వరుణే తన దగ్గరికి వచ్చిన రామ్ చరణ్ హీరోగా పరిచయం కాబోయే ‘చిరుత’ సినిమాకు అసిస్టెంట్ డైరెక్టరుగా పని చేసే అవకాశమివ్వమని అడిగాడట. కానీ ఆ తర్వాత ఏం జరిగిందో కానీ.. అది సాధ్యం కాలేదు.

దీని గురించి పూరి మాట్లాడుతూ.. ‘‘వరుణ్ ఆ రోజు నన్ను అసిస్టెంట్ డైరెక్టర్ గా ఛాన్స్ అడిగాడు. కానీ ఇప్పుడు అతడు హీరోగా చేసే సినిమాకు డైరెక్టర్ గా ఛాన్స్ ఇచ్చాడు’’ అంటూ చమత్కరించాడు పూరి. నితిన్ ‘లోఫర్’ సినిమా చేయనన్నాక వరుణ్ ని అడిగానని.. అతను ఫోన్లోనే ఒప్పేసుకున్నాడని వెల్లడించాడు పూరి. ఆ తర్వాత వరుణ్ మాట్లాడుతూ.. ‘‘నాకు అసిస్టెంట్ డైరెక్టరుగా ఛాన్స్ ఇవ్వకున్నా హీరోగా అవకాశమిచ్చిందుకు థ్యాంక్స్ సార్’’ అంటూ పూరిని ఉడికించాడు.