థ్రిల్ చేయనున్న ప్రియా వారియర్

ఒక్క కన్ను గీటి దేశంలోని కుర్రకారు మొత్తాన్ని తన వలలో వేసేసుకుని.. ఇంటర్నెట్ సెన్సేషన్ గా మారిపోయింది ప్రియా వారియర్. ఒక్కటంటే ఒక్క సినిమా కూడా విడుదల కాకుండా ఇంతటి ఇమేజ్ సంపాదించడం దాదాపుగా ఎవరికైనా అసాధ్యం అనాల్సిందే. అలాంటి ఈ బ్యూటీ నటించిన మొదటి సినిమా ఒరు అడార్ లవ్ ఇంకా విడుదల కావాల్సి ఉండగా.. ఇప్పుడీమెకు వరుస అవకాశాలు వచ్చిపడుతున్నాయి.

టాలీవుడ్ లో కూడా ఈమెను దింపేందుకు ప్రయత్నాలు జరుగుతున్నాయని అన్నారు కానీ.. అవేవీ వర్కవుట్ కాలేదు. ఇప్పుడు ఓ తమిళ సినిమాకు మాత్రం ప్రియా వారియర్ ఓకే చెప్పినట్లుగా తెలుస్తోంది. దర్శకుడు నాలన్ కుమార స్వామి తీసే సినిమాలు ఏ స్థాయిలో జనాలను ఆకట్టుకుంటాయో తెలిసిందే. సూదుకవ్వం.. కాదలం కాదంగ పోగుం వంటి చిత్రాలను తీసిన ఈయన.. ఇప్పుడు కొత్త నటీనటులతో ఓ గ్రాండ్ మూవీ చేయాలని యోచిస్తున్నాడు. ఇందులో ప్రధాన పాత్ర కోసం ప్రియా ప్రకాష్ వారియర్ ను ఫైనల్ చేసుకున్నారని తెలుస్తుంది.

థ్రిల్లర్ జోనర్ లో రూపొందే ఈ సినిమాకు.. ఇప్పుడు స్క్రిప్టును ఫైనల్ చేస్తున్నారు. ప్రియా ప్రకాష్ తో పాటు ఇతర నటీనటుల ఎంపిక కూడా జరుగుతోంది. ప్రీ ప్రొడక్షన్ పనులు ఓ కొలిక్కి వచ్చిన తర్వాత.. ఈ థ్రిల్లర్ మూవీ గురించిన అఫీషియల్ అనౌన్స్ మెంట్ రానుంది.