ఆనాటి జంట.. ఇప్పుడొచ్చెనంట

భూమిక చావ్లా.. తన రెండో సినిమా ఖుషీతో ఒక్కసారిగా స్టార్ అయిపోయింది. కొన్నేళ్ల పాటు టాప్ హీరోయిన్ గా టాలీవుడ్. కోలీవుడ్ ఇండస్ట్రీల్లో హవా కొనసాగించింది. రెండు భాషల్లో దాదాపు టాప్ హీరోలందరికీ పక్కన ఆడిపాడింది. అప్పటి యంగ్ హీరోలందరికీ బ్లాక్ బస్టర్ హిట్లిచ్చి లక్కీ గర్ల్ గా పేరు తెచ్చుకుంది. ఇప్పుడైనా టీవీలో ఖుషీ సినిమా వస్తే భూమిక అందమైన మోమును చూస్తూ ఉండిపోని వారుండరు. తరవాత యోగా గురు భరత్ ఠాగూర్ ను పెళ్లి చేసుకుని ఇండస్ట్రీకి దూరంగా వెళ్లిపోయింది భూమిక.

అలాంటిది ఉన్నట్టుండి ప్రభుదేవా హీరోగా భూమిక హీరోయిన్ గా ఓ సినిమా వస్తోంది. ఈ నెలలో రానున్న ఈ సినిమాలో భూమిక యమా హాట్ లుక్స్ తో కనిపిచింది. ఇది చూసిన ప్రేక్షకులకు అమలాపాల్ లాగా భూమిక కూడా పెళ్లయిన కొన్నాళ్లకు పద్ధతి మార్చేసిందా ఏంటి అనుమానమొచ్చింది. ఈ సినిమా పోస్టర్లను చూస్తే అందరికీ ఆనాటి భూమికే గుర్తొచ్చింది. కాకపోతే విషయమేంటంటే ఇది ఇప్పటి సినిమాకాదు. కళవాడియ పొళుదుగళ్‌ పేరుతో తంగర్ బచ్చన్ దర్శకత్వంలో తెరకెక్కిన ఈ సినిమా షూటింగ్ ఏడేళ్ల క్రితమే పూర్తయింది. ఇన్నాళ్లగా చీకట్లో ఉండిపోయిన ఈ సినిమాను నిర్మాతలు ఇప్పుడు బయటకు తీశారు.

కళవాడియ పొళుదుగళ్‌ ఓ అందమైన ప్రేమకథని డైరెక్టర్ తంగర్ బచ్చన్ అంటున్నారు. ఇన్నేళ్ల కాలంలో ప్రభుదేవా.. భూమిక లవ్ స్టోరీల స్థాయి దాటేసి మెచ్యూర్డ్ క్యారెక్టర్లు చేయడం మొదలెట్టి చాలాకాలమైంది. ఇప్పుడు ప్రేమికుల్లా వాళ్లిద్దరినీ చూడగలమా.. ఏమో తంగర్ బచ్చనే చెప్పాలి.