హృతిక్‌.. ప్రభాస్‌ 'వార్‌' రేంజ్‌ మూవీ

బాహుబలి.. సాహో సినిమాలతో పాన్ ఇండియా సూపర్‌ స్టార్ గా గుర్తింపు దక్కించుకున్న ప్రభాస్ ను బాలీవుడ్ సినిమాల్లో నటింపజేసేందుకు ఉత్తరాది ఫిల్మ్ మేకర్స్ ప్రయత్నాలు చేస్తున్నారు. బడా నిర్మాణ సంస్థలు ప్రభాస్ డేట్ల కోసం విపరీతంగా ప్రయత్నాలు చేస్తున్నాయి. కరణ్‌ జోహార్ తో పాటు ప్రముఖ నిర్మాతలు కూడా ప్రభాస్ తో సినిమాలను నిర్మించేందుకు వందల కోట్ల బడ్జెట్‌ తో సిద్దంగా ఉన్నారు. ఇప్పటికే ప్రభాస్ తన మొదటి బాలీవుడ్ సినిమా ఆదిపురుష్‌ ను చేస్తున్నాడు. ఆ సినిమా తర్వాత బాలీవుడ్‌ లో ప్రభాస్ చేయబోతున్న తదుపరి సినిమా కూడా ఖరారు అయ్యింది అంటూ జాతీయ మీడియా వర్గాల ద్వారా సమాచారం అందుతోంది.

వార్ వంటి బిగ్గెస్ట్‌ యాక్షన్ మూవీని తెరకెక్కించిన దర్శకుడు సిద్దార్థ్‌ ఆనంద్‌ దర్శకత్వంలో యశ్‌ రాజ్‌ ఫిల్మ్స్ వారు హృతిక్‌ రోషన్‌ మరియు ప్రభాస్‌ లతో భారీ యాక్షన్‌ సినిమాను తెరకెక్కించేందుకు చర్చలు జరుపుతున్నారు. ప్రస్తుతం షారుఖ్‌ ఖాన్‌ తో పఠాన్ సినిమా ను తెరకెక్కిస్తున్న సిద్దార్థ్ ఆనంద్‌ వచ్చే ఏడాది చివరి వరకు హృతిక్ మరియు ప్రభాస్‌ ల కాంబో మూవీని పట్టాలెక్కించేలా ప్రయత్నాలు చేస్తున్నారట. ప్రస్తుతం ప్రభాస్ చేతిలో ఉన్న సినిమాల జాబితా చాలా పెద్దగానే ఉంది. వాటికి తోడు ఇప్పుడు వార్‌ వంటి భారీ యాక్షన్‌ సినిమా ను చేసేందుకు ముందుకు రావడం ఆయన అభిమానులకు చాలా ఆనందాన్ని కలిగించే విషయం అంటూ ఇండస్ట్రీ వర్గాల అంటున్నారు. హృతిక్‌ రోషన్‌ మరియు ప్రభాస్‌ నిజమైన సూపర్‌ స్టార్స్‌ మల్టీ స్టారర్‌ మూవీ అవ్వడం ఖాయం అనిపిస్తుంది. ఈ విషయమై త్వరలో క్లారిటీ వస్తుందేమో చూడాలి.