ఆమిర్ సినిమాకు అదిరిపోయే రివ్యూలు

గత ఏడాది చివర్లో ‘దంగల్’ రూపంలో బ్లాక్ బస్టర్ కొట్టాడు ఆమిర్ ఖాన్. ఇంతలోనే ఆయన ఖాతాలో మరో సూపర్ హిట్ ఖాయమంటున్నారు. ఆమిర్ కొత్త సినిమా ‘సీక్రెట్ సూపర్ స్టార్’ విడుదలకు ముందే అద్భుతమైన రివ్యూలు తెచ్చుకుంటోంది. ఆమిర్ ఓ కీలక పాత్ర పోషిస్తూ తన నిర్మాణంలో ఈ చిత్రాన్ని తెరకెక్కించాడు. అద్వైత్ చౌహాన్ అనే కొత్త దర్శకుడు ఈ చిత్రాన్ని రూపొందించాడు.

‘దంగల్’లో ఆమిర్ కూతురిగా నటించిన జైరా ఈ చిత్రంలో లీడ్ రోల్ చేసింది. ఓ అమ్మాయికి సంగీతం అంటే ప్రాణం. కానీ ఆమె తల్లిదండ్రులు తనను ప్రోత్సహించారు. ఈ పరిస్థితుల్లో బురఖా ధరించి.. తనెవరో కనిపించకుండా.. ఓ అజ్నాత వ్యక్తిలా యూట్యూబ్‌ లోకి వచ్చిన తన ప్రతిభను అందరికీ చాటి చెప్పేలా చేస్తుంది. ఈ కథాంశంతో ఎంతో ఇన్ స్పైరింగ్ గా ఉండేలా ఈ చిత్రాన్ని రూపొందించాడట దర్శకుడు అద్వైత్. కథల ఎంపికలో ఆమిర్ మరోసారి తన అభిరుచిని చాటుకున్నాడని.. ఈ ఏడాది ఇండియాలో వచ్చిన గొప్ప సినిమాల్లో ఇదొకటని అంటున్నారు.

ప్రముఖ నటుడు నవాజుద్దీన్ సిద్ధిఖి అయితే ఈ ఏడాది బాలీవుడ్ బెస్ట్ మూవీ ఇదే అని తీర్పిచ్చేశాడు. ఆల్రెడీ ఈ సినిమా రివ్యూలు కూడా బయటికొచ్చేశాయి. అందరూ ఆమిర్.. అద్వైత్.. జైరాలపై ప్రశంసల జల్లు కురిపిస్తున్నారు. దీపావళి కానుకగా ఈ గురువారమే ‘సీక్రెట్ సూపర్ స్టార్’ రిలీజవుతోంది. మరి విడుదల తర్వాత ఈ చిత్రానికి ఎలాంటి స్పందన వస్తుందో చూద్దాం.