ఇప్పుడు అందరి దృష్టి ఆ సినిమాలపైనే..!

ప్రస్తుతం టాలీవుడ్ హీరోలంతా 'పాన్ ఇండియా' జపం చేస్తున్నారు. ప్రతీ హీరో కూడా మిగతా భాషల్లో తన చిత్రాన్ని రిలీజ్ చేసి మార్కెట్ ని విస్తరించుకోవాలని చూస్తున్నారు. ఇప్పటికే చిరంజీవి - ప్రభాస్ - అల్లు అర్జున్ - ఎన్టీఆర్ - రామ్ చరణ్ వంటి స్టార్ హీరోలు నటించిన పాన్ ఇండియా సినిమాలు ప్రేక్షకులు చూసేశారు. ఇప్పుడు టైర్-2 హీరోల వంతు వచ్చింది.

రౌడీ స్టార్ విజయ్ దేవరకొండ - నేచురల్ స్టార్ నాని - యూత్ కింగ్ అఖిల్ అక్కినేని - ఉస్తాద్ రామ్ పోతినేని వంటి యువ హీరోలు త్వరలో పాన్ ఇండియా చిత్రాలతో అలరించబోతున్నారు. ఆగస్ట్ చివరి వారంలో రాబోయే 'లైగర్' మొదలుకొని 'దసరా' 'ఏజెంట్'.. ఇలా ఒకదాని తర్వాత ఒకటి థియేటర్లలోకి రాబోతున్నాయి.

డాషింగ్ డైరెక్టర్ పూరి జగన్నాధ్ దర్శకత్వంలో విజయ్ దేవరకొండ హీరోగా నటించిన పాన్ ఇండియా స్పోర్ట్స్ యాక్షన్ మూవీ ''లైగర్''. బాక్సింగ్ బ్యాక్ డ్రాప్ లో తెరకెక్కిన ఈ సినిమాలో మైక్ టైసన్ కీలక పాత్ర పోషించగా.. అనన్య పాండే హీరోయిన్ గా నటించింది. పూరీ కనెక్ట్స్ మరియు ధర్మ ప్రొడక్షన్స్ సంస్థలు కలిసి భారీ స్థాయిలో ఈ చిత్రాన్ని నిర్మించారు.

'లైగర్' చిత్రాన్ని ఆగస్ట్ 25న గ్రాండ్ గా రిలీజ్ చేయడానికి సన్నాహాలు చేస్తున్నారు. ఇప్పటి వరకు వచ్చిన ప్రమోషనల్ కంటెంట్ కు మిశ్రమ స్పందన వచ్చినప్పటికీ.. సోషల్ మీడియాలో మంచి బజ్‌ ని క్రియేట్ చేసింది. సినిమాపై నెలకొన్న హైప్ ని బట్టి భారీ ఓపెనింగ్స్ ని ఆశించవచ్చు.

నాని మరియు కీర్తి సురేష్ హీరోహీరోయిన్లుగా నటిస్తున్న పాన్ ఇండియా మూవీ ''దసరా''. ఈ సినిమాతో శ్రీకాంత్ ఓదెల అనే కొత్త దర్శకుడు ఇండస్ట్రీకి పరిచయం అవుతున్నాడు. తెలంగాణ బ్యాక్ డ్రాప్ లో పక్కా రూరల్ డ్రామాగా ఈ చిత్రాన్ని తీర్చిదిద్దుతున్నారు. ఇందులో నాని కెరీర్ లోనే తొలిసారిగా ఊర మాస్ అండ్ రగ్గుడ్ లుక్ లో కనిపించనున్నారు.

షూటింగ్ దశలో ఉన్న 'దసరా' చిత్రానికి సంబంధించి ప్రస్తుతానికైతే ఎలాంటి సందడి లేదు. టీజర్ రిలీజ్ చేసిన తర్వాత సినిమాపైనే హైప్ వచ్చే అవకాశం ఉంది. ఫస్ట్ లుక్ ని బట్టి చూస్తే.. విభిన్నమైన కంటెంట్‌ తో రాబోతున్నట్లు స్పష్టం అవుతుంది. శ్రీలక్ష్మీ వెంకటేశ్వర సినిమాస్ పతాకంపై ఈ చిత్రాన్ని నిర్మిస్తున్నారు. త్వరలోనే రిలీజ్ డేట్ ను లాక్ చేయనున్నారు.

అఖిల్ అక్కినేని హీరోగా స్టైలిష్‌ ఫిలిం మేకర్‌ సురేందర్‌ రెడ్డి దర్శకత్వంలో తెరకెక్కుతున్న క్రేజీ పాన్ ఇండియా మూవీ ''ఏజెంట్''. ఇందులో మలయాళ సూపర్ స్టార్ మమ్ముట్టి కీలక పాత్ర పోషిస్తుండగా.. సాక్షి వైద్య హీరోయిన్ గా నటిస్తోంది. యాక్షన్ స్పై థ్రిల్లర్ గా రూపొందుతున్న ఈ సినిమాలో అఖిల్ సరికొత్త లుక్ లో కనిపించనున్నాడు.

ఇప్పటికే 'ఏజెంట్' నుంచి విడుదలైన ప్రమోషనల్ కంటెంట్ కు మంచి రెస్పాన్స్ వచ్చింది. ఇటీవల వచ్చిన టీజర్ సినిమాపై అంచనాలు రెట్టింపు చేసింది. అక్కినేని హీరోల కెరీర్ లోనే ఇది బెస్ట్ ఓపెనింగ్స్ రాబట్టే అవకాశం ఉందనే టాక్ నడుస్తోంది. ఏకే ఎంటర్టైనెంట్స్ బ్యానర్ లో రూపొందుతున్న ఈ సినిమాని దీపావళి లేదా క్రిస్మస్ సందర్భంగా రిలీజ్ చేయాలని భావిస్తున్నారు. కుదరకపోతే సంక్రాంతి బరిలో నిలిపే ఆలోచన కూడా చేస్తున్నట్లు వార్తలు వస్తున్నాయి.

రామ్ పోతినేని హీరోగా ఊర మాస్ డైరెక్టర్ బోయపాటి శ్రీను దర్శకత్వంలో ఓ పాన్ ఇండియా మూవీ తెరకెక్కనున్న సంగతి తెలిసిందే. శ్రీనివాస సిల్వర్ స్క్రీన్ బ్యానర్ పై ఈ సినిమా రూపొందనుంది. యాక్షన్ ఎపిసోడ్స్ - ఎమోషనల్ సీన్స్ కు పేరు గాంచిన బోయపాటి.. ఎనర్జిటిక్ హీరో రాపో తో కలిస్తే బాక్సాఫీస్ బద్దలు అవడం ఖాయమని అభిమానులు భావిస్తున్నారు. త్వరలోనే ఈ చిత్రానికి సంబంధించిన పూర్తి వివరాలు వెల్లడికానున్నాయి.

ఇటీవల కాలంలో 'పుష్ప: ది రైజ్' 'RRR' మినహా మరే సినిమా కూడా ఇండియన్ బాక్సాఫీస్ వద్ద పెద్దగా ప్రభావం చూపించలేదు. ఈ నేపథ్యంలో ఇప్పుడు అందరి దృష్టి టైర్-2 హీరోల పాన్ ఇండియా సినిమాలపైనే ఉంది. మరి ఈ చిత్రాలు ఎలాంటి సక్సెస్ అందుకుంటాయో వేచి చూడాలి.