మెగాస్టార్ సాంగ్ రీమిక్స్ లో పవన్?

ప్రస్తుతం మెగా ఫ్యామిలీ నుంచి వచ్చిన హీరోలందరూ మెగాస్టార్ పాత పాటలను రీమిక్స్ చేసి వాడేసుకుంటున్నారు. ఇప్పటివరకూ చిరు పాటను రీమిక్స్ చేయని మెగా హీరో ఎవరన్నా ఉన్నారంటే.. పవర్ స్టార్ పవన్ కళ్యాణ్ ఒక్కడే. ఇప్పుడా లోటు కూడా సర్దార్ సినిమాతో తీర్చేయబోతున్నాడు పవర్ స్టార్. సర్దార్ గబ్బర్ సింగ్ లో చిరంజీవి ఓ సూపర్ హిట్ సాంగ్ కి రీమిక్స్ వెర్షన్ పెట్టేశారట.

'నా కోక బాగుందా.. నా రైక బాగుందా'.. అంటూ రాధ అడిగితే.. 'నీ కోక నచ్చింది.. నీ రైక నచ్చింది' అంటూ మెగాస్టార్ చిరంజీవి చెప్పి, కలిసి డ్యాన్స్ చేసిన పాటను మెగా ఫ్యాన్స్ ఎవరూ మర్చిపోలేరు. ఇప్పుడా సాంగ్ ను రీమిక్స్ చేసి సర్దార్ లో ఐటెం సాంగ్ గా మార్చేశాడట పవన్. ఈ పాటలో పవర్ స్టార్ పక్కన రాయ్ లక్ష్మీ డ్యాన్సులు చేయనుండగా.. నా కోక బాగుందా సాంగ్ రీమిక్స్ పనులను ఇప్పటికే పూర్తి చేసేశాడు మ్యూజిక్ డైరెక్టర్ దేవిశ్రీ ప్రసాద్.

తొలిసారిగా చిరు పాటలో డ్యాన్స్ చేస్తూ పవన్ కళ్యాణ్ కనిపించడమంటే.. అదో పెద్ద సెన్సేషన్ అయిపోతుందని, థియేటర్లు దద్దరిల్లిపోనున్నాయని తెలుస్తోంది. కొంతకాలం క్రితం సర్దార్ షూటింగ్ స్పాట్ కి చిరంజీవి వచ్చిన విషయం జనాలకు గుర్తుండే ఉంటుంది. ఈ పాట తీసే సమయంలోనే చిరు వచ్చారన్నది టాక్.