పవన్ నుంచి ఆ ఒక్క స్టిల్ చాలు

పవర్ స్టార్ బర్త్ డే వేడుకలను అభిమానులు గ్రాండ్ గానే సెలబ్రేట్ చేసుకున్నారు. ముందు రోజు నుంచే మొదలైన హంగామా.. సెప్టెంబర్ 2 అర్ధరాత్రి వరకూ కొనసాగింది. అభిమానులను అలరించేందుకు పవన్ నుంచి కూడా తగినంత స్థాయిలోనే అప్ డేట్స్ వచ్చాయి.

పాలిటిక్స్ కి లింక్ లేకుండా ట్వీట్స్ పెట్టడం గమనించాల్సిన విషయం. ముందు రోజే విడుదలైన కాన్సెప్ట్ పోస్టర్.. మెగాస్టార్ తో కలిసి దిగిన ఫోటో.. అనిరుధ్ నుంచి 1 మినిట్ సాంగ్ ప్రోమో.. ఇలా రకరకాలుగా ఫ్యాన్స్ ను అలరించేందుకు ప్రయత్నించాడు పవన్. అయితే.. అన్నిటి కంటే అభిమానులు బాగా ఎంజాయ్ చేసిన అంశం మాత్రం వేరే. పవన్ బర్త్ డే స్పెషల్ గా రిలీజ్ చేసిన సాంగ్ ప్రోమోలో.. చిట్ట చివరి షాట్ లో పవన్ మాత్రమే కనిపిస్తాడు. అది కూడా కేవలం ఒకే స్టిల్ ఇస్తాడు. ఒంటికాలిపై కుర్చీ గింగిరాలు తిరుగుతూ ఉంటే.. పక్కనే ఉన్న పవన్ చేతులు కట్టుకుని సీరియస్ గా చూస్తూ ఉంటాడు. ఇది ఓ ఫైట్ తాలూకు సన్నివేశం అని తెలుస్తూనే ఉన్నా.. ఈ ఒక్క స్టిల్ చూసి ఫ్యాన్స్ తెగ సంబరపడిపోతున్నారు. ఇండస్ట్రీ జనాలకు కూడా ఈ షాట్ భలేగా నచ్చేసింది.

ఎస్ ఎస్ రాజమౌళి కూడా ఈ షాట్ పై ప్రత్యేకంగా ట్వీట్ చేయడం విశేషం. "వావ్.. సింపుల్ మెలోడీ.. సింగిల్ షాట్ తో పవర్ స్టార్ ఎంత ఎఫెక్ట్ చూపించేస్తున్నారో? త్రివిక్రమ్ స్టైల్.. #PSPK25" అంటూ సాంగ్ ప్రోమోను పోస్ట్ చేశాడు జక్కన్న. దర్శకధీరుడే ఇంతగా మెస్మరైజ్ అయితే.. ఇక ఫ్యాన్స్ పరిస్థితి ఎలా ఉంటుంది చెప్పండి!