పవన్‌ రాకతో.. ఫ్రెండ్ అండ్‌ ఫ్యాన్ ఖుషీ

సర్దార్ వచ్చింది, వెళ్లిపోయింది.. మరిప్పుడు పవన్ కళ్యాణ్ ఏం చేస్తున్నాడనే డౌట్ ఎవరికైనా ఉంటే.. వాటిని నితిన్ తీర్చేశాడు. నితిన్ హీరోగా త్రివిక్రమ్ శ్రీనివాస్ తెరకెక్కిస్తున్న అ..ఆ.. షూటింగ్ స్పాట్ కి వచ్చాడు పవన్. ఈ విషయాన్ని ఓ ఫోటోతో పాటు ట్వీట్ చేసి తన ఆనందాన్ని అభిమానులతో నితిన్ పంచుకున్నాడు.

మాటల మాంత్రికుడు త్రివిక్రమ్, పవర్ స్టార్ పవన్ కళ్యాణ్ లు బెస్ట్ ఫ్రెండ్స్ అనే విషయం తెలిసిందే. అలాగే పవన్ కి వీరాభిమానుల లిస్ట్ రాస్తే.. అందులో తానే టాప్ అంటాడు నితిన్. మరి తన ఫ్రెండ్, ఫ్యాన్ కలిసి చేస్తున్న సినిమా షూటింగ్ స్పాట్ కి పవన్ కళ్యాణ్ రావడం సంథింగ్ స్పెషల్ అనాల్సిందే. చాలా సింపుల్ గా అ..ఆ.. చిత్రీకరణ జరుగుతున్న ప్రాంతానికి వచ్చిన పవన్.. అక్కడ చాలాసేపే గడిపాడట.

పవర్ స్టార్ ముందు యాక్టింగ్ చేయాలంటే చాలా ఇబ్బంది పడిపోయానంటూ చెప్పుకొచ్చాడు నితిన్. ఈ నెలాఖరులో అ..ఆ చిత్రానికి ఆడియో విడుదల కార్యక్రమం జరపాలని త్రివిక్రమ్ నిర్ణయించినట్లుగా తెలుస్తోంది. ఏప్రిల్ 27న ఈ వేడుక జరిగే అవకాశం ఉండగా.. రిలీజ్ విషయంలో మే 20ని ఎంచుకునే ఛాన్సులు ఉన్నాయట.